Aqtóbe ákimi Arystaǵy úılerdi qalpyna keltirý jumysymen tanysty
Oblys ákimi baspasóz qyzmetiniń habarlaýynsha, óńir basshysy Aqtóbe óńirine bekitilgen 12-sektorda júrgizilip jatqan qurylys jumystarymen tanysyp, jergilikti turǵyndarmen kezdesti. Onda 765 turǵyn úı, 5 áleýmettik nysan bar. Búginde 765 úıdiń barlyǵy zerttelip, tekserýden ótken. Búlingen 472 turǵyn úıge akti jasaldy.
«Ońdasyn Orazalınniń birinshi orynbasary Rahat Sydyqovqa osy jumystardyń qarqyndy ári sapaly júrýine qatysty birneshe tapsyrma júkteldi. Ákim jumysty qolǵa alǵan aqtóbelik merdiger mekemege qurylysty ýaqytynda aıaqtaý qajettigin aıtty. Sondaı-aq, óńir basshysy oqıǵa kezinde qaza tapqan eki azamattyń otbasyna kóńil aıtyp, qaıǵylaryna ortaqtasty», - dep habarlady baspasóz qyzmeti.
Aıta keteıik, tehnıkalyq tekserý kezinde búlingen 472 úıdiń úsheýine snarıad túsken. Bul úılerde qurylys-montajdaý jumystary júrip jatyr. Ári O. Jánibekov kóshesindegi 12 páter men bir turǵyn úıdiń shatyry aýystyrylady. Qazir 236 baspana tolyqtaı qalpyna keltirildi. Qurylys jumystaryna 58 jumysshy jáne 7 arnaıy tehnıka jumyldyryldy. Tekserý kezinde 273 turǵyn úıge eshqandaı zalal kelmegeni belgili boldy.
Eske salsaq, Aqtóbe óńiri Arys qalasynda bolǵan tótenshe jaǵdaı kezinde kómek qolyn sozdy. Sóıtip «Paryz» qorynyń esepshotyna 126 mln teńgeden astam qarjy aýdarylǵan. Onyń ishinde «SNPS-Aqtóbemunaıgaz» AQ bólgen 50 mıllıon teńge bar.
