Aqtóbe ákimdigi úıi órtengen otbasyǵa kómek kórsetetin boldy
AQTÓBE. QazAqparat - Senbi kúni óńir basshysy Ońdasyn Orazalınniń jáne shahar basshysy Іlııas Ispanov Aqtóbe qalasyn jumys babymen aralap júrgen kezinde AZF aýdanyndaǵy baý-baqsha ujymynda qıyn jaǵdaı oryn alǵany jetkizildi, dep habarlaıdy qala ákiminiń baspasóz qyzmeti.
Saǵat tańǵy 10-da baý-baqsha ýchaskesinde alańy 80 sharshy metr bolatyn úı órtendi.
Órt saǵat 10.42-de tótenshe jaǵdaılar departamentiniń kúshimen aýyzdyqtalyp, saǵat 11.04-te joıyldy. Oǵan 11 qyzmetker men úsh tehnıka jumyldyryldy. 16 jastaǵy jasóspirim gazdan ýlandy degen kúdikpen aýrýhanaǵa jatqyzyldy. Órttiń sebebi anyqtalýda.
Órt jaǵdaıymen tanysqan oblys ákimi Aqtóbe qalasynyń ákimdigine zardap shekken otbasyǵa jan-jaqty kómek kórsetý jóninde tapsyrma berdi. Sol úshin arnaıy jumys toby quryldy. Úıi órtengen jandarǵa ýaqytsha baspana, azyq-túlik, jyly kıimder, birinshi kezekte qoldanatyn zattar berilip, olarmen psıhologtar jumys istep jatyr.
«2018 jyly qazan aıynda tótenshe jaǵdaılar departamentiniń qyzmetkerleri aýlalardy aralap shyǵý kezinde atalmysh otbasyǵa órtke qarsy qaýipsizdik nusqalyǵyn júrgizgen»,-delingen baspasóz málimetterinde.
