Aqtóbe ákimdigi travmatologtarmen yntymaqtastyq memorandýmyna qol qoıdy
AQTÓBE. QazAqparat - Aqtóbege AQSh, Germanııa, Reseı, Qytaı, Túrkııa, Ońtústik Koreıa elderiniń hırýrg, travmatologtary kelip, tótenshe jaǵdaı, jol-kólik oqıǵasy kezinde zardap shekken naýqasty emdeý joldaryn talqylad. Aqtóbe oblysynyń ákimdigi men shetel travmatologtary yntymaqtastyq memorandýmyna qol qoıdy, dep habarlaıdy QazAqparat tilshisi.
Aqtóbede qaterli isik, júrek-qan tamyrlary aýrýynan keıingi úshinshi orynda jol-kólik oqıǵalary kezinde zardap shekkenderdiń ólimi tur. Medıtsına klasterin damytýdy qolǵa alǵan óńir bul joly sheteldik travmatologtardy jınap, naýqasty tasymaldaý, ota jasaý, emdeý, ońaltý joldary boıynsha tájirıbe almasty.
«Memleket basshysy Nursultan Nazarbaev árbir qazaqstandyqtyń densaýlyǵyna basa kóńil bóledi. Berilgen tapsyrmaǵa sáıkes óńirde halyqtyń densaýlyǵyn jaqsartyp, uzaq ómir súrýi úshin jumys istep jatyrmyz. Eger biz dúnıejúzindegi ozyq tájirıbelerdi ózimizdiń medıtsına salasyna engizsek, bizdiń jumysymyz nátıjeli bolady. Osy maqsatta Ońtústik Koreıa, Túrkııa, Qytaı, Reseı, Izraıl elderindegi áriptestermen baılanys ornady. Máselen, memlekettik-jeke menshik áriptestik aıasynda jedel járdem stantsııasy elimiz boıynsha Aqtóbede alǵash ret salynyp jatyr. Túrik ınvestorlary qalaǵa 33 reanımobıl ákeldi. Sonymen qatar, óńirde oftalmologııalyq emhana qurylysy bastaldy. Balalardyń stomatologııalyq emhanasy da boı kóterip jatyr. Al jańa móltek aýdanda emhana qurylysy júrgiziledi. Bári de memlekettik-jeke menshik áriptestik aıasynda salynady. Jalpy jospar boıynsha bıyl barlyǵy 35 medıtsınalyq mekemeniń qurylysyn bastaımyz»,- dedi oblys ákimi Berdibek Saparbaev.
Aqtóbede medıtsınalyq klasterdi damytý maqsatynda Ońtústik Koreıa, Izraıl, Reseımen arada yntymaqtastyq kelisim ornady. Nátıjesinde ótken jyly óńirge ózge oblystar men Ózbekstan, Reseıdiń Orynbor oblysynan barlyǵy 8 myń adam kelip, em alǵan. «Ótken jyly Ońtústik Koreıa eliniń dárigerleri men jergilikti mamandar 25 búırek, 7 baýyr aýystyrý otasyn jasady. Sońǵy kezde búırek aýystyrý otasyn aqtóbelik dárigerlerdiń ózderi jasap júr. Sonymen qatar, óńirde júrek-qan tamyrlary aýrýyna 280 ota, endoprotezdeý boıynsha 500-ge jýyq ota jasaldy. Bir ókinishtisi, kadr tapshy. Aýrýhanalardyń jabdyqtalýy halyqaralyq talapqa saı kelgenimen dárigerlerdiń biliktiligi joǵary bolmaı jatady. Sondyqtan Elbasyna tapsyrmasyna saı dárigerlerdi oqýǵa jiberip, úzdikterdi tájirıbe almasý úshin óńirge shaqyramyz. Bıyl jyl sońyna deıin oblysta travmatologııa ortalyǵy ashylady»,- dedi B.Saparbaev.
Kezdesý sońynda oblys ákimdigi men Shyńjań-Uıǵyr avtonomııalyq aýdanynyń halyqtyq aýrýhanasymen, Sent Lýıs ýnıversıtetiniń ortopedııalyq gospıtalymen ózara yntymaqtastyq memorandýmyna qol qoıdy.
