Aqtóbe ákimdigi toqtap turǵan zaýyttarǵa ınvestorlar izdep jatyr
AQTÓBE. QazAqparat - Aqtóbede birneshe zaýyt pen óndiris orny toqtap tur. Qazirgi ýaqytta ákimdik pen kásipkerler olardyń jumysyn jandandyrý úshin ınvestorlar izdep jatyr, dep habarlaıdy QazAqparat tilshisi qala ákiminiń baspasóz qyzmetine silteme jasap.
Búgingi kúni qańyrap turǵan zaýyttar men óndiris oryndaryn saýyqtyrý, iske qosý, bos turǵan ǵımarattardy paıdalaný jospary iske asyrylyp jatyr. Qala ákimdiginde ótken keńeste Aqtóbe basshysy Іlııas Ispanov kásipkerlerdi óz bıznesin saýyqtyrý úshin ınvestorlar izdep, tyǵyryqtan shyǵý jolyn tabýdy tapsyrdy.
«Qala aýmaǵynda 8 nysan toqtap tur. Onyń ekeýi múlde jabylyp qaldy. Olar: shaǵyn traktor shyǵarý zaýyty men toqyma fabrıkasy. Eki nysannyń óndiristik bazasy memlekettik-jekeshelik áriptestik negizinde sport kesheni men bıznes-ınkýbatorǵa berildi»,- dep habarlady qala ákiminiń baspasóz qyzmeti.
Sonymen qatar, uıashyqty beton óndirý zaýytyn reseılik «TD Foton» JShS kompanııasy satyp aldy. Qazirgi kezde múlikti satý-satyp alý kelisimi jasaldy. Investor osy jyldyń ekinshi jartyjyldyǵynda zaýytty tolyqtaı qaıta qurý jáne jańǵyrtý jumystaryn júrgizedi.
Aıta keteıik, Aqtóbe qalasynda «Jan Amı ı K» JShS, «Hobas Paıps Qazaqstan» JShS, «Aktıýbselmash» zaýyty jáne «Edemı» JShS-nyń jumysy toqtap tur. Kásiporyndar kóbine qarjy aınalymynyń jetispeýshiligi men qural-jabdyqtardyń tozýynan turalap qalǵan.
