Aqtóbe ákimdigi «Táýelsizdik monýmentin» zańǵa sáıkes alyp tastamaq
AQTÓBE. QazAqparat - Aqtóbe ákimdigi «Táýelsizdik monýmentin» zańǵa sáıkes alyp tastamaq. Qalalyq sáýlet jáne qala qurylysy bólimi metaldy qurastyrmanyń qulap qalý qaýpimen kásipkerden sot sheshimin oryndaýdy talap etip otyr, dep habarlaıdy QazAqparat tilshisi.
Aqtóbe qalasyndaǵy «Táýelsizdik monýmenti» belgisiniń ornatylǵanyna 9 jyl boldy. Sodan beri qala turǵyndary esh shaǵym aıtpady, jergilikti ákimdik «ruqsat joq, qujatty rásimde» dep eskertý bermedi. Al ótken jyldyń 23 jeltoqsany kúni Aqtóbe qalasynyń ákimdigi, Aqtóbe qalasynyń jer qatynastary bólimi, qalalyq sáýlet jáne qala qurylysy bólimi jerge ıelik etip otyrǵan kásipker Mánzıpa Baıjarqynovany sotqa berdi. Іs qaralyp, ákimdik jeńiske jetti. Sebebi, kásipker jerdi kógaldandyrýy tıis eken.
«Balalardyń oıyn alańy, attraktsıondar bul jerde bolmaýy tıis. Jerdi maqsatty ıgerý zańdylyǵy tekserilip, bul aýmaqty kásipker kógaldandyrý qajet bolǵandyǵy anyqtaldy. Sot sheshimi shyqty. Apellıatsııalyq sot otyrysynda da alǵashqy sheshim ózgerissiz qaldyryldy. Úkim kúshine endi»,- dedi qalalyq sáýlet jáne qala qurylysy bóliminiń basshysy Erbol Kenjaly.
Qalalyq sáýlet jáne qala qurylysy bólimi zańsyz ǵımarattarmen jumys júrgizýdi bastaǵanyn, kez kelgen jer teliminiń, nysan men qurylystyń zańǵa sáıkes bolýyn tekserip jatyr.
«Meniń jumysqa kiriskenime áli bir jyl tolǵan joq. Tapsyrma boıynsha qala kórkin qalpyna keltirý, zańsyz qurylysty anyqtap, tártip ornatý qajet boldy. Elimizde zań bar, qurylys zańǵa sáıkes júrgiziledi. Eger zańsyz salǵan ǵımarat qulap, adam ólip jatsa, oǵan kim jaýap beredi? Monýment - bizdiń sımvol. Oǵan eshkim tıise almaıdy. Bul jerde sımvol emes, metaldy qurylysty aıtyp turmyz»,- dedi Erbol Kenjaly.
Qalalyq sáýlet jáne qala qurylysy bólimi jer ıesimen sóıleskenin, monýmentti saraptamadan ótkizip, zańdastyrǵan soń, ony ózge jerge ornatýǵa kelisim jasalǵanyn aıtty.
Eske salaıyq, Aqtóbe qalasynyń bas dańǵylyndaǵy «Táýelsizdik monýmenti»súriletindigi týraly buǵan deıin habarlaǵan bolatynbyz. Almatydaǵy monýmenttiń shaǵyn kóshirmesi munda 2008 jyldyń jeltoqsanynda ashyldy.
