Aqtóbe ákimdigi órt kezinde qaza bolǵandardyń denesin Ózbekstanǵa jetkizip beredi
AQTÓBE. QazAqparat - Aqtóbe oblysyndaǵy avtobýs órti kezinde qaza bolǵan adamdardyń múrdesi máıithanaǵa jetkizilgen. Keıinnen ony oblys ákimdigi Ózbekstanǵa jóneltedi, dep habarlaıdy QazAqparat tilshisi.
Úkimet komıssııasynyń músheleri «Aqtóbe aqparat» ortalyǵynda baspasóz máslıhatyn ótkizdi.
«Aqtóbe oblysynyń ákimdigi múrdelerdi oblys ortalyǵyna jetkizýge jáne Ózbekstanǵa jóneltýge kómek kórsetedi. Múrdelerdi aýyldan alyp ketýge ekinshi kólik jóneltildi. Sot-medıtsınalyq saraptama táýlik boıy, úzdiksiz júrgiziledi. Keıin qaza bolǵan adamdardyń denesin Ózbekstanǵa jóneltemiz»,- dedi Aqtóbe oblysy ákiminiń orynbasary Serik Tólenbergenov.
Baspasóz máslıhaty kezinde órtten aman qalǵan adamdardyń densaýlyǵy týraly da aıtyldy. Olar gazǵa qatty ýlanyp qalǵan.
«Aman qalǵan 5 adam tolyq medıtsınalyq tekserýden ótti. Jaǵdaılary qalypty. Eki adamnyń qolyn kúıik shalǵan. Aman qalǵan adamdar ýlanǵan. Psıhologtar da kómek kórsetip jatyr», - dedi Densaýlyq saqtaý vıtse-mınıstri Alekseı Tsoı,
Aıta keteıik, búgin tún ortasynda Úkimet komıssııasy baspasóz máslıhatyn ótkizdi. Onda oqıǵa qylmystyq is emes, qaıǵyly jaǵdaı ekeni aıtyldy.
