Aqtóbe ákimdigi óńir basshysynyń shalǵaı aýylǵa nelikten tikushaqpen barǵanyn túsindirdi
AQTÓBE. QazAqparat – Aqtóbe oblysynyń ákimi Ońdasyn Orazalın Muǵaljar jáne Baıǵanın aýdandaryna tikushaqpen bardy. Jeli qoldanýshylary arasyndaǵy qyzý talqydan soń ákimdik onyń sebebin túsindirdi, dep habarlaıdy QazAqparat tilshisi.
«Jeksenbi kúni oblys ákimi Ońdasyn Orazalın Jańajoldaǵy «Gas Processing Company» JShS-nyń jumysymen tanysty. Ótken jyly Qaratóbede tótenshe jaǵdaı bolyp, munaı tógilip qalǵan bolatyn. Ákim sol jerde jıyn ótkizip, oǵan quzyrly organ ókilderi de qatysty. Bul issaparǵa tikushaqpen bardy. Tikushaq oblystyq tótenshe jaǵdaılar departamentine qaraıdy. Osyndaı kezde qoldanýǵa ruqsat bar. Ken ornyna baryp, ekologtarǵa da tıisti tapsyrma berdi», - dedi oblys ákiminiń baspasóz qyzmetkeri Ǵanı Jápishov.
Aıta keteıik, oblys ákimi óz sapary kezinde Baıǵanın aýdanyndaǵy mektep, balabaqsha jumysymen tanysyp, halyqpen kezdesti.
«Tikushaqpen ekinshi ret saparǵa shyqty. Buǵan deıin áskerı tikushaqpen shekarany aralaǵan bolatyn. Oblys ákimi tikushaqqa minbeý kerek degen zań joq. Naqty qansha aqsha bólingenin aıta almaımyn», - dedi Ǵanı Jápishov.
Eske salsaq, Ońdasyn Orazalın 2019 jyldyń aqpany aıynda Aqtóbe oblysyna ákim bolyp taǵaıyndalǵan bolatyn.
