Aqtóbe ákimdigi Mustafa Shoqaıdyń sýretin nege óshirtti

Aqtóbedegi 5 qabatty turǵyn úıdiń qabyrǵasyna Mustafa Shoqaıdyń portreti salynyp, el óskeleń urpaqqa tárbıe beretin bastamaǵa qýanǵan edi. Biraq bul qýanysh kópke barmaı, sý sepkendeı basyldy. Áleýmettik jelide Arman Sqabyluly «Alashtyń arysy Aqtóbege bóten be edi?» degen taqyrypta óz oıyn qaldyrǵan.

«Aqtóbede jańa kóshege alashtyń arysy Mustafa Shoqaıdyń aty berilip, jańa turǵyn úıdiń qabyrǵasyna sýreti qashalady degenge turǵyndar kədimgideı marqaıyp qalǵan. Keshe əleýmettik jelilerdiń birinen myna sýretti kórip, tóbemnen bireý sý quıyp jibergendeı boldym. Mustafa babamnyń əp-ədemi beınesin əkim-qaralardyń biriniń buıryǵymen qaıta boıap, kózden bulbul ushyrǵan», - dep jazyp, keıin oblys ákimi Berdibek Saparbaevtan, jalpy aqtóbelik sheneýnikterden jaýap kútip otyrǵanyn jetkizgen. Qurylys basyndaǵylar da bul sheshimge túsine almaı otyr.

«Batys-2 aýdanyndaǵy kóshege Mustafa Shoqaıdyń aty beriledi, sýretin salý kerek dep ákimdik tapsyrma berdi. Al demalysta sýretti óshirtti. Biz de bilmeı qaldyq. Nege ekenin suraǵanymda qurylys basyndaǵylar sebebin bilmedi. Basshymyzǵa habarlasyp edim, óshirip tastaýǵa tapsyrma bergenin aıtty. Negizi buǵan deıin ol jerde turǵyn úıdiń jarnamasy boldy. Bizge jarnama bannerin alyp tastap, Mustafa Shoqaı kóshesine arnap, onyń portretin salýdy tapsyrdy. Adam izdep, sýretshini Alǵa aýdanynan taptyq. Sýret salý jumystaryna barlyǵy tórt kún ketti. Keıin ákimdiktiń adamdary kórip, «jaqsy eken, sýretshiniń baılanys telefonyn berińizshi» dep surap ta aldy. Biz de qýanyp qaldyq. Sýretshi aldymen qabyrǵany boıap, keıin sýret salýdy bastady. Óte muqııat jumys istedi. Biraq qazir túsinbeı otyrmyz. Bizge tez sal dep te májbúrledi. Tipti tapsyrý aktisin bergen kezde qol qoımaı, portret bolǵan kezde ǵana ruqsat beremiz dedi. Biz saldyq, ákimdik turǵyn úıdi tapsyrýǵa ruqsat berdi. Al qazir mynadaı jaǵdaıǵa tap boldyq», - dedi «CB Projoct»  JShS bas ınjeneri Gınatýlla Ermekov.

Bul máseleniń mán-jaıy týraly qalalyq sáýlet jáne qala qurylysy bólimi basshysynyń orynbasary Erkin Ordabaev  túsinikteme berdi.

«Sýretshi portretti durys salmaǵan. Keıin ony qalpyna keltirýge tyrysqan eken, biraq boıaýy durys bolmaǵan eken. Jańbyrǵa shydamady, portret búlindi. Bir jaǵynan, Mustafa Shoqaıdyń basqa da sýretterin salýǵa bolady ǵoı.

Salynyp jatqan úıler kóp. Barlyq úıge qazaqtyń batyrlaryn salýǵa bolady. Endi ol jerge Mustafa Shoqaıdyń sýreti salynbaıdy. Bálkim basqa bir aqynnyń, qazaqtyń batyrynyń sýreti salynýy múmkin. Taǵy bir aıta ketetin jaıt, sýret salmas buryn qurylys kompanııasy qalalyq ákimdikten ruqsat alýy kerek edi. Biraq olar bizben kelispeı, óz betterimen sheshim qabyldaǵan»,- dedi Erkin Ordabaev.