Aqtóbe ákimdigi kóktemgi sý tasqynynyń aldyn alý jumystaryna kiristi
AQTÓBE. QazAqparat - Aqtóbede kóktemgi sý tasqynynyń aldyn alý jumystaryna 180 mıllıon teńge bólindi. Qazirgi kezde 5 myń tonna ınertti materıal, qum toltyrylǵan 2 myń qap ázirlendi, dep habarlaıdy QazAqparat tilshisi.
Aqtóbede ótken jyly ózender arnasynan asyp, qala mańyndaǵy baý-baqsha sýǵa ketken bolatyn. Jalǵyz baspanasyn tastap qashqan qarapaıym halyq qazaqstandyqtardan kómek surap, arnaıy qaıyrymdylyq qory quryldy. Al bıyl ákimdik erte qamdanyp, tótenshe jaǵdaıdyń aldyn alýǵa kiristi. Aqtóbe qalasy ákimi apparatynyń áskerı jumyldyrý jumysy, azamattyq qorǵanys jáne tótenshe jaǵdaılar bóliminiń basshysy Bekbolat Nurashevtiń aıtýynsha, tótenshe jaǵdaıdyń aldyn alýǵa 180 mıllıon teńge bólinip, sý tasqynyna qarsy kúres shtaby quryldy.
«Endi saıajaılardy aralaý, olarǵa qaýipsizdik erejelerin túsindirý, eskertý berý bastalady. Kóktemgi sý tasqyna qarsy is-sharalaryna 100-den astam assenızator mashınasy, 20 avtotsısterna, 20-dan astam aýyr tehnıka jumyldyrylady. Býldozerler, krandar, ekskavatorlar, tıegishter de bolady. Biz sýdyń arnalaryn tazartamyz. Sonymen qatar, sý tasqynyna qarsy 5000 tonna ınertti materıaldar jáne 2 myń dana qum toltyrylǵan qapshyq daıyndaý josparlandy»,- dedi Bekbolat Nurashev.
Aıta keteıik, ótken jyly bolǵan sý tasqynynan soń ózen jaǵasy nyǵaıtylyp, bógetter salyndy. Ózenderdiń tabany tazartylyp, tereńdetildi. Bıyl sý tasqyny kezeńinde turǵyndardy evakýatsııalaý qajet bolsa, olardy qaladaǵy №8,15,26,31 jáne aýyldyq okrýgterdegi mektepterge ornalastyrý qarastyrylǵan.
