Aqtóbe ákimdigi gaz baǵasynyń qymbattaý sebebin túsindirdi
Aqtóbe oblysy aı saıyn 13 myń tonna suıytylǵan gaz paıdalanady. Al QR Energetıka mınıstrligi qazan aıynda 11 160 tonna suıytylǵan otyn bólýdi josparlady. Aqtóbe oblysynyń turǵyn úı-kommýnaldyq sharýashylyǵy jáne energetıka basqarmasynyń gazben jabdyqtaý bóliminiń basshysy Samat Lepesovtyń aıtýynsha, onyń 3 924 tonnasy elektrondy saýda alańdarynan tys (35%) jáne 7 236 tonnasy elektrondy saýda alańy arqyly (65%) satyldy.
«Elektrondy saýda alańdarynan tys jerkizý kezinde shekti baǵa bekitilgen. Tonnasyna 38 701,67 teńgeni quraıdy. Al elektrondy saýda alańy arqyly satylǵanda baǵa ártúrli. Orta eseppen shildede tonnasyna 67 082, tamyzda 69 808, qyrkúıekte 84 365 jáne qazanda 82 000 myń teńge boldy. Búgingi tańda zaýyttardan 958 tonna suıytylǵan munaı gazy jóneltildi. Alaıda temirjol arqyly jóneltiletin júktiń kólemi artyp, osy aıdyń basynda «Qazaqstan temir joly» AQ stantsııalarynda tsısternalardy jóneltý keshiktirildi. Búgingi tańda Aqtóbe qalasyna 25 vagon tsısterna nemese 900 tonna júk kelip tústi. Gaz toltyrý stansalaryna jóneltý jumystary júrgizilip jatyr. Budan basqa 16 vagon tsısterna nemese 576 tonna Jem jáne Qandyaǵash stansalarynda tur», - dedi Aqtóbe oblysynyń turǵyn úı-kommýnaldyq sharýashylyǵy jáne energetıka basqarmasynyń gazben jabdyqtaý bóliminiń basshysy Samat Lepesov.
