Aqtóbe ákimdigi dızel otyny tapshylyǵyna qatysty túsinik berdi

AQTÓBE. QazAqparat – Aqtóbede júrgizýshiler dızel otynynyń tapshylyǵyn aıtyp, kómek surady. Qazir óńir solıarkany Reseıden alýdy josparlap otyr, dep habarlaıdy QazAqparat tilshisi.

Aqtóbede júrgizýshiler solıarka tapshylyǵyn aıtyp, qoǵam nazaryn aýdardy.

«Tapshylyq bir basqa, baǵa da kóterildi. Buǵan deıin lıtrin 188 teńgege satyp alsaq, qazir 270-28 teńge boldy. Keıbir janar-jaǵarmaı stansasynda 250 teńge. Árkim óz baǵasyn usynyp otyr. Tasymaldaýshylar úshin qıyn», - dedi júrgizýshi Ádilbek Mahmutov. Onyń aıtýynsha, janar-jaǵarmaı stansalarynyń keıbiri 50-150 lıtr solıarka quıýǵa ruqsat beredi. Al júk kóligi ár 100 shaqyrymǵa 35 lıtr jumsaıdy. Saldarynan ár 100 shaqyrym saıyn toqtap, solıarka quıýǵa týra keledi. Al jolda ondaı múmkindik joq ekenin alǵa tartty olar.

«Qazirgi ýaqytta Aqtóbe oblysy úsh munaı óndirý zaýytynan dızel otynyn alady. Bireýi jóndeý júrgizý úshin ýaqytsha toqtaıdy. Tapshylyq sodan tirkeldi. Sonymen birge qazirgi ýaqytta qorda 2 myń tonna solıarka bar. Onyń qansha ýaqytqa jetetinin naqty aıta almaımyn. Biraq az ekeni anyq. Energetıka mınıstligimen birlesip Reseıden 5,5 myń tonna dızel otynyn alý boıynsha máselesi boıynsha jumys pysyqtalyp jatyr. Kelgen soń jaǵdaı jaqsara túsýi tıis. Qashan jetkiziletini belgisiz. Erkin saýdada solıarka bar. Degenmen shekteý de bar. Talonmen satylady», - Aqtóbe oblystyq kásipkerlik basqarmasy bóliminiń basshysy Dýman Dáýletııarov.