Aqtóbe ákimdigi aıaq kıimge arnalǵan 200 maıly súrtkish satyp alý sebebin túsindirdi
«Aqtóbe oblysy ákimdiginiń is basqarmasy» kommýnaldyq memlekettik basqarmasy sheteldik delegatsııaǵa, ınvestorlarǵa jáne syrttan keletin qonaqtarǵa arnap aıaq kıim tazalaıtyn gýbka satyp aldy.
«Bul sheteldikter kelgende, qonaqtarǵa paıdalanylady. Memlekettik satyp alý kezinde 200 myń teńgege konkýrs jarııalanǵanymen, jeke kásipker 99 600 teńgege utyp aldy. Ár danasy 498 teńge bolyp tur. Taýar áli jetkizilgen joq», - dedi Aqtóbe oblysy ákimdigi Іs basqarmasy basshysynyń orynbasary Tımýr Ryskeldın.
Eske salsaq, 2021 jyly Aqtóbe ákimdigi 50 qolshatyr satyp aldy. Oblys ákimdiginiń is basqarý basqarmasy qolshatyrdy ishki jáne halyqaralyq kezdesýlerde qoldanatynyn aıtty. Qolshatyr satyp alý jónindegi habarlandyrý 2021 jyldyń maýsym aıynda shyqqan. Alǵashqy baǵasy 428 571, 60 teńge.
«Satyp alý qorytyndysy boıynsha jáne jeńildikti eskere otyryp «Mýlbaeva» JK jáne «TAMI» JK-men 195 570 teńge kóleminde taýar jetkizýge shart jasaldy. Bul satyp alý resmı delegatsııanyń (ishki jáne halyqaralyq) aldaǵy úsh jylǵa kezdesýlerin uıymdastyrý úshin qajet boldy. Negizi úsh jyl saıyn satyp alynady. Shetelden kelgen delegatsııanyń kómekshileri jańbyrly, qarly kúni paıdalana alady. Eki túri bar. Birinshisiniń qolǵa ustaıtyn jeri aǵashtan jasalǵan. Eki adamǵa arnalǵany. Bul qolshatyrdy delegatsııa kelgende paıdalandyq»,- dedi Aqtóbe oblysy ákimdiginiń Іs basqarý basqarmasy basshysynyń mindetin atqarýshy Meıram Áýelbekov.
