Aqtóbe ákimdigi aýrýhanalardaǵy qazirgi jaǵdaıdy túsindirdi
AQTÓBE. QazAqparat - Aqtóbede ókpeniń qabyný derine shaldyqqan adam sany artty. Qazir aýrýhanalarmen qatar emhanalarda qabyldaý júrip jatyr, dep habarlaıdy QazAqparat tilshisi.
Aqtóbede koronavırýs ınfektsııasyna shaldyqqandar sany 610-ǵa jetti. Olardyń jartysy emdeldi. Turǵyndar tarapynan shaǵym aıtqandar kóbeıip, oblys ákimniń orynbasary shuǵyl tikeleı efırge shyqty.
«Sońǵy kezde naýqastar sanynyń kóbeıgeni jasyryn emes. Basty sebep - karantınnen keıingi jeńildetý. Joldar ashyldy, kásipkerlik nysandary jumysyn jandandyrdy. Kúnine 3500 adam temirjol, 500-600 adam áýejoly arqyly qatynaıdy. Shekaradan 300-deı kólik ótedi. Sonymen birge qazir skrınıng ótip jatyr. Adamdar da sanıtarııa talaptaryn saqtaýdy azaıtty. Buǵan deıin toı ótkizýge ruqsat surasa, qazir blokposttardy qaıta qoıýdy ótenedi. Qazir Aqtóbe qalasy men Shalqar, Muǵaljar aýdandarynda shekteý bar. Naýqastardy qabyldaý úshin 1536 oryn daıyndaldy. Oryn jetispeýshiligi joq. Infektsııalyq aýrýhananyń 50 paıyzy, provızorlyq aýrýhananyń 65 paıyzy, karantındik gospıtaldiń 57 paıyzynda naýqastar em alyp jatyr. Óńirde ókpeniń qabynýy artty. Búgingi kúni 360 adam tirkeldi. Olardy Qarǵaly, temirjol aýrýhanalary qabyldady. Árıne, adamdar úıine jaqyn jerde em qabyldaǵysy keledi. Sodan Temirjol aýrýhanasyna túsýshiler kóbeıip, keıin narazylyq týǵany ras. Dárigerlerge túsindirý jumysy júrgizildi. Sebebi olarda sońǵy 2-3 táýlikte adam kúrt kóbeıdi», -dedi oblys ákiminiń orynbasary Nurjaýǵan Qalaýov.
Aıta keteıik, Aqtóbede sanıtarııalyq talaptyń saqtalýyn qadaǵalaýǵa 92 monıtorıng toby qurylǵan. Olar 2 myńnan astam tekserý júrgizdi.
