AQTQ dertin juqtyrǵandardyń basym bóligi áleýmettik belsendi jastaǵy top- Densaýlyq saqtaý vıtse-mınıstri
ASTANA. Jeltoqsannyń 1-i. QazAqparat /Qanat Mámetqazyuly/ - Qazaqstanda AQTQ (VICh) dertin juqtyrǵandardyń basym bóligi áleýmettik belsendi jastaǵy top bolyp tabylady. Bul týraly búgin Densaýlyq saqtaý mınıstrliginde «Qazaqstandaǵy AQTQ/JQTB boıynsha jaǵdaı jáne onyń aldyn alý» atty taqyrypta ótken baspasóz máslıhatynda Densaýlyq saqtaý vıtse-mınıstri Tamara Voşenkova málim etti,
dep habarlaıdy QazAqparat.
«Dertti juqtyrý jaǵdaılary 20-dan 39-ǵa deıingi áleýmettik belsendi jas toptary arasynda jıi kezdesip otyr. Máselen, olardyń úles salmaǵy jalpy juqtyrǵandardyń 77,7 paıyzyn quraıdy. AQTQ juqtyrǵandardyń basym kópshiligi jumys istemeıtin adamdar», dedi Tamara Voşenkova. Onyń aıtýynsha, sońǵy jyldary AQTQ ınfektsııasynyń jynystyq jolmen berilý kórsetkishteri aıtarlyqtaı ósken. Atap aıtqanda, 2009 jyldyń on aıynda osy jolmen aýrý taralý kórsetkishi 35,5 paıyzdy quraǵan. Salystyrmaly túrde qaraǵanda, 2008 jyly jynystyq jolmen aýrý juqtyrǵandar sany 29,6 paıyzdy, 2007 jyly 19,8 paıyzdy, 2006 jyly 24,5 paıyzdy quraǵan eken.
Qazaqstandaǵy AQTQ juqtyryp, tirkelgenderdiń 72,6 paıyzy (9 myń 774 adam) er adam bolsa, 27,4 paıyzy (3 myń 689 adam) áıelder. Degenmen de, Densaýlyq saqtaý mınıstrliginiń ókilderi AQTQ ınfektsııasyna shaldyqqan urpaqty bolý jasyndaǵy áıelderdiń kóbeıýine erekshe alańdaýshylyq bildiredi. Máselen, respýblıkada aǵymdaǵy jylǵy qarashanyń 1-degi jaǵdaı boıynsha 1 myń 192 AQTQ juqtyrǵan júkti áıelder tirkelgen. Al jalpylama toqtalsaq, búginge deıin AQTQ ınfektsııasyna shaldyqqan áıelden 812 bala týsa, onyń ishinde bıylǵy jyly dúnıege kelgen sábılerdiń sany 174 bolyp otyr.
