Aktıvterin qaıdan alǵanyn rastaı almaǵan qazaqstandyqtar baılyǵyn memleketke tapsyrady

ASTANA. QazAqparat – Deklaratsııany tapsyrý kezinde óz aktıvterin qaıdan alǵanyn rastaı almaǵan qazaqstandyqtardyń baılyǵy memleketke qaıtarylady. Bul týraly Májilistiń jalpy otyrysynda «Zańsyz alynǵan aktıvterdi memleketke qaıtarý týraly» zań jobasyn birinshi oqylymda talqylaý kezinde Májilis depýtaty Elnur Beısenbaev málim etti, dep habarlaıdy QazAqparat tilshisi.

Qujatta shet elderdegi aktıvterdi qaıtarý boıynsha jumysty zań aıasynda júrgizý tetikteri qarastyrylǵan. Zań jobasynda aktıvterdi qaıtarýdyń erikti nemese májbúrli tártibi kózdelgen. Birinshiden, erikti túrde qaıtarý – ózderine tıesili múlikti memleketke óteýsiz berý jolymen júzege asyrylady. Ekinshiden, sottardyń sheshimderi negizinde qylmystyq protsess aıasynda zańsyz alynǵan aktıvterdi tárkileý qarastyrylyp otyr

, - dedi E. Beısenbaev.

Sonymen qatar ol múliktiń qylmystyq jolmen alynǵany ashylǵan kezde, zańsyz alynǵan aktıvterdi májbúrlep qaıtarý eskerilgenin aıtty.

Sottardyń nemese shet memleketterdiń ózge de ýákiletti organdarynyń sheshimderi negizinde tárkileý de iske asyrylady. Jalpy, zań aıasynda arnaıy komıssııa qurylady, zańdy jáne jeke tulǵalardyń reestri paıda bolady, arnaıy memlekettik qor men ýákiletti organ qurylady

, - dedi depýtat.

Zań jobasynda azamattyq protsess aıasynda tárkileýdiń mynadaı algorıtmi eskerilgen:

Birinshi. Eger monıtorıng jáne aqparatty taldaý qorytyndylary boıynsha quny 100 mln AQSh dollarynan asatyn aktıvti satyp alýdyń zańdylyǵyna baılanysty kúmán bolsa, ýákiletti organ sýbektini jáne onyń úlestes tulǵalaryn reestrge engizý máselesin komıssııanyń qaraýyna shyǵarady.

Ekinshi. Materıaldardy qaraý qorytyndylary boıynsha komıssııa adamdy reestrge engizý nemese qospaý týraly usynys beredi.

Úshinshi. Ýákiletti organ reestrge engen azamattarǵa olardyń aktıvteri týraly deklaratsııany tapsyrý quqyǵynyń bar ekenin jetkizedi. Deklaratsııalardy tekseredi jáne tekserý nátıjelerin Komıssııanyń qaraýyna shyǵarady. Sonyń nátıjesinde, komıssııa odan ári sharalar qabyldaý týraly usynymdar shyǵarady.

Eger adam deklaratsııany tapsyrý arqyly óz aktıvterin qaıdan alǵanyn rastaı almasa nemese deklaratsııany tabys etpese, mundaı aktıvter negizsiz baılyq retinde tanylyp, memleket kirisine qaıtarylýy múmkin. Adamdardyń quqyǵyn qorǵaýǵa, ashyq protseske kepildik berý jáne azamattyq qoǵam jaǵynan baqylaýdy qamtamasyz etý maqsatynda zań jobasynda tıisti qadamdar eskerilgen. Bul turǵyda adamdardyń jabyq reestri jasalady, sebebi bul baǵytta repýtatsııalyq máseleler bar. Sonymen qatar, atalǵan komıssııanyń máseleni alqaly tártipte qaraýy eskerilgen. Komıssııaǵa depýtattar men qoǵam belsendileri múshe bola alady. Atap aıtqanda, adal satyp alýshylar men adal kredıtorlardyń quqyqtary qorǵalady. Jalpy, barlyq satylarda sotqa shaǵymdaný múmkindigi bar, sondaı-aq kelisim talaptaryn oryndaǵan adamdar úshin kepildikter beriledi

, - dedi Elnur Beısenbaev.

Budan buryn habarlanǵandaı, zań jobasy aıasynda zańsyz shyǵarylǵan aktıvterdi qaıtarý jónindegi Arnaıy ýákiletti organ men komıssııa qurylady, zańdy jáne jeke tulǵalardyń jabyq reestri jasalynyp, memlekettik qor jasaqtalady.