Zańsyz aktıvterdi shyǵarý qaı salada jıi baıqalady – Bas prokýratýra
ASTANA. KAZINFORM – Zańsyz aktıvterdi memleketke qaıtarý jumysy tek múlikti anyqtap, elge qaıtarýmen shektelmeıdi. Zerdeleý barysynda mamandar jer qoınaýyn paıdalaný, memlekettik qoldaý sharalary men ınvestıtsııalyq jobalarǵa beriletin jeńildikterge qatysty júıeli máselelerdi de anyqtap otyr. Bul týraly QR Bas prokýratýrasy Aktıvterdi qaıtarý qyzmetiniń basshysy Nurdáýlet Súıindikov «Bizdin orta» podkastynda aıtty.
Aktıvterdi qaıtarý qyzmeti qaı aktıvtiń qandaı jolmen zańsyz ıemdengenin tekseredi jáne memlekettik organdarǵa zańnamany jetildirý týraly usynymdar beredi.
– Ásirese kóp aktıvter jer qoınaýyn paıdalaný kelisimsharttary arqyly elden shyǵarylady. Biz jer qoınaýyn paıdalaný kelisimsharttaryn teksergende, belgili bir artyqshylyqtar men jeńildikter paıdalanylǵan jaǵdaılardy kórdik. Mysaly, óńdeý fabrıkasyn salý úshin jer qoınaýyn alady. Biraq fabrıka salynbaı, shıkizattyń ózi shetelge satylǵan, – dedi ol.
Mamandardyń kóterip otyrǵan taǵy bir máselesi – iri ınvestıtsııalyq jobalarǵa memlekettik qoldaý kórsetý kezinde olardyń uzaq merzimdi tıimdiligin jetkilikti deńgeıde baǵalaý.
– Bireý joba jasaımyn dese, onyń tıimdiligi az qaralady da, Úkimet bar jaǵdaıyn jasap beredi. Jolyn salyp beredi, kommýnıkatsııasyn ótkizip beredi. On jylǵa salyqtan bosatyp, arzan nesıe beredi. Keıin qarasańyz, eki jylda-aq mıllıardtaǵan tabys taýyp otyrady. Úkimetke de, depýtattardyń nazaryna da ózimiz kórgen júıeli problemalardy, zańdaǵy kemshilikterdi jiberip otyramyz. Sonyń aldyn alý joldaryn aıtamyz, – dedi Nurdáýlet Súıindikov.
Buǵan deıin N. Súıindikov Qazaqstanda adamnyń aýqatty bolýy onyń aktıvterin memleket avtomatty túrde tekserýdi bildirmeıtinin aıtqan edi.
Podkast qonaǵynyń tolyq suhbatyn myna jerden oqýǵa bolady.
