Aktıvterdi qaıtarý «jeke menshikti qorǵaý» qaǵıdasyna qaıshy kelmeı me – Bas prokýratýra jaýaby
ASTANA. KAZINFORM – Qazaqstanda zańsyz ıemdenilgen aktıvterdi memleketke qaıtarý tetigi Konstıtýtsııada bekitilgen jeke menshik quqyǵyn qorǵaý kepildigine qaıshy kelmeıdi. Sebebi sot múliktiń zańdy jolmen jáne zańdy qarajatqa alynǵanyn baǵalaıdy. Bul týraly QR Bas prokýratýrasy Aktıvterdi qaıtarý qyzmetiniń basshysy Nurdáýlet Súıindikov «Bizdin orta» podkastynda aıtty.
Onyń aıtýynsha, aktıvterdi qaıtarý týraly zańda «aktıvterdiń túsiniksiz shyǵý tegi» degen uǵym qarastyrylǵan. Mundaı tetik halyqaralyq tájirıbede de qoldanylady. ıAǵnı adamnyń resmı tabysy men ıeligindegi aktıvteriniń quny arasynda eleýli aıyrmashylyq bolsa, olardyń qaıdan jáne qandaı qarajatqa alynǵany týraly másele týyndaıdy.
– Mysaly, ómir boıy qarapaıym jumys istegen adam tórt qabatty kottedjdi qaıdan aldy degen suraq týyndaýy múmkin. Kóptegen elderde azamattar tabysy men múlkine qatysty esep berýge daǵdylanǵan. Sondyqtan resmı kiriste kórsetilmegen, shyǵý tegi qujatpen rastalmaǵan múlik anyqtalsa, «túsiniksiz baılyq» uǵymy qoldanylady. Eger memleket suraq qoıǵanda adam múlkiniń qaıdan kelgenin jáne ony qandaı qarajatqa alǵanyn dáleldeı almasa, sot múlikti tárkileý týraly sheshim shyǵarýy múmkin. Sol tetik bizdiń 2023 jyly qabyldanǵan zańnyń negizgi jańalyqtarynyń biri sanalady, – dedi Nurdáýlet Súıindikov.
Aktıvterdi qaıtarýdyń májbúrleý sharalarynyń biri retinde Aktıvterdi qaıtarý qyzmeti sotqa talap aryz bere alady.
Bul jaǵdaıda sotta jaýapker óz múlkin zańdy jolmen jáne zańdy qarajatqa alǵanyn dáleldeýge tıis. Eger usynylǵan dálelder jetkiliksiz dep tanylsa, sot múlikti memleket kirisine aınaldyrý týraly sheshim qabyldaýy múmkin.
Sonymen qatar aktıvterdi qaıtarý sharalary adal kásipkerler men adal nesıe berýshilerdiń quqyqtaryna qoldanylmaıdy. Kerisinshe, zań olardyń quqyqtaryn qorǵaýǵa baǵyttalǵan.
Nurdáýlet Súıindikov aktıvterdi qaıtarý rásimi adamnyń qylmystyq nemese ákimshilik jaýapkershiligin anyqtaýǵa baǵyttalmaǵanyn atap ótti.
– «Kinásizdik prezýmptsııasy» qaıda qaldy dep suraıtyndar tabylady. Bul ábden zerttelgen taqyryp jáne adamdy quqyqtyq jaýapqa tartý máselesine qatysty uǵym. Al biz adamǵa emes, múlikke talap qoıamyz. Jeke adamnyń quqyqbuzýshylyq jasaǵan-jasamaǵanyn anyqtamaımyz. Sondyqtan «kinásizdik prezýmptsııasy» bul jerde jumys istemeıdi, – dedi ol.
Podkastta Konstıtýtsııada bekitilgen jeke menshik quqyǵyn qorǵaý kepildigi men aktıvterdi qaıtarý týraly zańnyń araqatynasy da túsindirildi. Spıkerdiń aıtýynsha, memleket zańdy jolmen alynǵan múlikke ǵana quqyqtyq qorǵaý kepildigin beredi.
– Álemdik quqyqtaný salasynda memleket tek zańdy jolmen alynǵan múlikke kepildik beredi jáne ony qorǵaıdy. Bireýdiń teledıdaryn urlap alsańyz, memleket oǵan kepildik bermeıdi ǵoı. Sondyqtan múlik zańdy jolmen alynsa, adal kásipker bolsańyz, sizge eshqandaı suraq qoıylmaıdy, – dedi Nurdáýlet Súıindikov.
Podkast qonaǵynyń tolyq suhbatyn myna jerden oqýǵa bolady.
