Aktıvterdi qaıtarý zańy kúshine engennen beri qansha aqsha syrtqa shyǵaryldy — Bas prokýratýra jaýaby
ASTANA. KAZINFORM — «Zańsyz ıemdenilgen aktıvterdi memleketke qaıtarý týraly» zań kúshine engen 2023 jyldyń shildesinen beri Qazaqstan aýmaǵynan qansha aktıv jylystatyldy? Osy týraly málimet alý úshin Bas prokýratýraǵa saýal joldaǵan edik.
Bas prokýratýra zańsyz ıemdelgen aktıvterdi qaıtarý protsesi týraly oqtyn-oqtyn málimet jarııalap jatqanymen, qoǵamda osy jumystardyń tym jabyqtyǵy týraly syn kóp. Keıbir sarapshylar, qoǵam belsendileri arnaıy zań qabyldanyp, arnaıy quzyrly organ osy ispen tyńǵylyqty aınalysyp jatqanyna qaramastan, túpki kózi kúmándi baılyǵyn syrtqa asyrý áreketteri áli tyıylmaı jatqanyn aıtyp, dabyl qaǵady.
Zań kúshine engennen beri el aýmaǵynan neshe mıllıon teńgeniń aktıvi shyǵaryldy? Belgili bolǵan naqty derekter sany qansha? Bul faktiler boıynsha qansha tergeý bastalyp, shottar buǵattaldy, kelissózder júrgizildi? Qazir qaıtarylyp jatqan aktıvterdiń ishinde osy zań kúshine engennen keıin shyǵarylǵan aktıvter bar ma? El kókeıinde júrgen osy jáne ózge de suraqtardy Bas prokýratýraǵa joldaǵanbyz.
— Zańnyń 8-babynyń 3-tarmaǵyna sáıkes aktıvterdi qaıtarý jónindegi ýákiletti organ jáne komıssııanyń músheleri alynǵan málimetterdiń saqtalýyn jáne jasyryndyǵyn qamtamasyz etýge mindetti. Osyǵan baılanysty, komıtettiń qaraýyna túsken málimetterdiń mazmuny taratylýy shekteýli aqparatqa jatady. Sonymen qatar, tekserý nátıjeleri boıynsha jetkilikti negizder bolǵan jaǵdaıda komıssııanyń maquldaýymen aktıvterdi qaıtarý sharalary qabyldanady. Aktıvterdi qaıtarý boıynsha jumys nátıjeleri, sondaı-aq olardy zańdy ekonomıkalyq aınalymǵa tartý men tıimdi paıdalaný týraly málimetter buqaralyq aqparat quraldarynda turaqty túrde jarııalanyp turady, — dep qysqa qaıyrǵan Bas prokýratýra qyzmetkerleri.
Sondaı-aq, jaýapta zań kúshine engen 2023 jyldyń 12 shildesinen búginge deıin 103 mlrd teńgeniń múlki memleketke qaıtarylǵany aıtylǵan.
— Búgingi kúnge, zań tetikterin paıdalana otyryp, memleketke 749 mlrd teńgeden astam somadaǵy aktıvter qaıtaryldy, onyń ishinde 645 mlrd teńgeden astam aqshalaı qarajat túrinde, al quny 103 mlrd teńgeden astam turatyn múlik zattaı qaıtaryldy, — dep jazylǵan jaýapta.
Buǵan deıin depýtat Baqytjan Bazarbek Astana Hub ortalyǵy maınıng fermalar arqyly zańsyz aktıvterdi jylystatýǵa jol berip otyr degen kúmán bildirgen bolatyn.