Aktıvterdi qaıtarý osymen toqtap qalmaý kerek – Qaıyrbek Arystanbekov

ASTANA. KAZINFORM – Aktıvterdi qaıtarý komıtetiniń mártebesi ózgergenmen, shetelge zańsyz shyǵarylǵan aktıvterdi elge ákelý protsesi toqtamaý kerek. Ekonomıkalyq saıasat ınstıtýtynyń dırektory, Prezıdent janyndaǵy Ulttyq quryltaı múshesi Qaıyrbek Arystanbekov osyndaı pikir aıtty.

Ekonomıst bıylǵy Joldaýda makroekonomıkalyq turaqtylyqqa basa mán berilgenin aıtady. Memleket basshysy Ulttyq bank pen Úkimet jumysynyń úılesimdi bolý kerektigin bul joly da kótergen bolatyn.

- Bul másele bizde áli de tolyǵymen sheshilgen joq. Rasymen de Úkimet pen Ulttyq bank arasynda qarama-qaıshylyq bar. Naqtyraq aıtsam, Úkimettiń bıýdjet saıasaty men Ulttyq banktiń nesıe saıasaty bir-birine qarama-qaıshy kelip jatyr. Prezıdent ınflıatsııany aýyzdyqtaý máselesin taǵy kóterdi. Jyldyń ınflıatsııa deńgeıi 12 paıyzdyń tóńireginde. Muny qarapaıym halyqtyń qaltasyn qaǵatyn salyq dep qaraýǵa bolady, - deıdi sarapshy.

Ulttyq quryltaı múshesiniń aıtýynsha, Aktıvterdi qaıtarý komıtetin Investorlardyń quqyqtaryn qorǵaý komıteti dep ataý týraly bastama zańsyz aktıvterdi qaıtarý protsesi múldem toqtaıdy degendi bildirmeıdi.

- Menińshe, bul - shetelden kapıtaldy qaıtarý jumysy toqtaıdy degen sóz emes, jalǵasatyn sııaqty. Biraq Prezıdent qosymsha ınvestorlardyń múddesin qorǵaýǵa erekshe mán berip otyrǵan syńaıly. Jalpy shetelden aktıvterdi qaıtarý jumysyn ári qaraı jalǵastyrǵan durys sııaqty. Óıtkeni bizdiń esebimiz boıynsha, shetelge shamamen 180-200 mlrd dollar zańsyz ketken. Al komıtet jumysynyń nátıjesinde 1 trln teńge ǵana (shamamen 2 mlrd dollarǵa jýyq) kirgen. Bul - óte az, - dedi Qaıyrbek Arystanbekov.

Sarapshy Ulttyq qordyń turaqty damý quraly retindegi róli týraly pikir bildirdi.

- Ulttyq qordan uzaq merzimdi, strategııalyq mańyzy bar, iri jobalardy qarjylandyrýǵa bolady. Mysaly, sý resýrstaryn tıimdi paıdalaný, saqtaý, ınfraqurylymyn salý ispettes jobalardy kirgizýge bolady. Energetıka salasyndaǵy iri jobalarǵa da Ulttyq qor aqshasyn baǵyttaýǵa bolady. Kólik-logıstıka salasyndaǵy iri jobalardy da Ulttyq qordan qarjylandyrýǵa bolady. Sebebi bul uzaq merzimdi jáne halyqtyń múddesine jumys isteıtin jobalar dep aıtýǵa negiz bar, - dedi Ekonomıkalyq saıasat ınstıtýtynyń dırektory.

Eske salsaq, Prezıdent bıylǵy Joldaýynda Bas prokýratýranyń Aktıvterdi qaıtarý jónindegi komıteti endi ınvestorlar quqyǵyn qorǵaý komıteti dep atalatynyn málim etken edi.