Aktıvterdi qaıtarý komıssııasynyń jumysy nege kórinbeıdi – Bektenov jaýaby

ASTANA. KAZINFORM — Premer-mınıstr Oljas Bektenov Úkimette ótken baspasóz máslıhatynda ózi jetekshilik etetin «Aktıvterdi qaıtarý komıssııasynyń jumysy nege kórinbeıdi?» degen suraqqa jaýap berdi.

− Zańda kózdelgen tártippen aqparatty jarııalap otyramyz. Men Premer-mınıstr retinde jetekshilik etetin aktıvterdi qaıtarý jónindegi komıssııa zań sýbektilerimen, ıaǵnı aktıvterdi qaıtaryp jatqan tulǵalarmen jalpy somasy 900 mıllıard teńgege kelisimder jasasty. Naqty famılııalar jarııalanbaıdy, bul zań talaby. Meniń oıymsha, bul durys. Sebebi iri bıznesmenniń esimin mundaı kontekste ataý onyń basqaryp otyrǵan nemese ıelik etetin kompanııasynyń bedeline nuqsan keltiredi. Al bizdegi kóptegen jarııa kompanııalar bar, olardyń sheteldik seriktesteri kóp. Sondyqtan, mundaı aqparatty jarııalaý oń nátıje bermeıdi, kerisinshe, otandyq bıznesimizge teris áser etýi múmkin, − dep túsindirdi O. Bektenov.

Premerdiń aıtýynsha, olar zań aıasynda el aldyndaǵy mindettemelerin oryndaıdy. Óz kezeginde olardyń Qazaqstanda jumys istep, ınvestıtsııa salyp, Qazaqstandy turaqty orny retinde qarastyrýy úshin qolaıly jaǵdaı jasaý kerek.

− Al jumys toby arqyly qaıtarylǵan qarajattar bilim berý, densaýlyq saqtaý, TKSh sekildi áleýmettik mańyzy bar maqsattarǵa baǵyttalady. Bul aqparatty biz turaqty túrde usynyp otyramyz. Munda aqparat tapshylyǵy joq dep oılaımyn, − dedi O. Bektenov.

Aıta keteıik, jyl basynan beri qaıtarylǵan aktıvterdiń 318,1 mlrd teńgesi áleýmettik jobalarǵa bólindi.