Aktıvterdi qaıtarý: Kez kelgen baı adamnyń múlki tekserile me
ASTANA. KAZINFORM – Qazaqstanda adamnyń aýqatty bolýy onyń aktıvterin memleket avtomatty túrde tekseredi degendi bildirmeıdi. Aktıvterdi qaıtarý tetigin qoldaný úshin zańda belgilengen birneshe talap qatar oryndalýy qajet. Bul týraly QR Bas prokýratýrasy Aktıvterdi qaıtarý qyzmetiniń basshysy Nurdáýlet Súıindikov «Bizdin orta» podkastynda aıtty.
Qazaqstanda zańsyz ıemdenilgen aktıvterdi memleketke qaıtarý tetigi 2023 jylǵy 12 shildede qabyldanǵan arnaıy zańmen retteledi. Qujatqa sáıkes, aktıvterdi qaıtarý tetigi, eń aldymen, joǵary memlekettik laýazym atqarǵan nemese atqaratyn tulǵalarǵa, kvazımemlekettik sektor sýbektilerine jáne olarmen úlestes tulǵalarǵa qatysty qoldanylady.
Bul rette aktıvterdiń jıyntyq quny zańda belgilengen shekten – 13 mln AEK-ten (56,225 trln teńge) asýy qajet.
N. Súıindikovtiń aıtýynsha, adamnyń baı bolýy onyń aktıvteri boıynsha tekserý júrgizýge ózdiginen negiz bola almaıdy.
– Bul «baı bolsań boldy, seni tergeıdi» degen sóz emes. Qazaqstanda óz eńbegimen dáýlet jıǵan aýqatty azamattar kóp. Ómir boıy bıznes salasynda jumys istep, memleketten esh jeńildik almaǵan, zańsyz áreketimen kózge túspegen, kerisinshe zaýyt salǵan nemese qyzmet kórsetý salasynda bıznes qurǵan kásipkerler bar. Olarǵa tek baılyǵy úshin suraq qoıa almaımyz, – dedi ol.
Bas prokýratýra ókili aktıvterdi qaıtarý tetigin qoldaný úshin úsh negizgi belgi qatar bolýy qajet ekenin túsindirdi.
Birinshiden, adamnyń nemese onymen baılanysty tulǵalardyń aktıvteri zańda belgilengen 13 mln AEK sheginen asýy tıis. Ekinshiden, aktıvterdiń zańdy jolmen alynýyna qatysty qısyndy kúmán bolýy kerek.
– Bul «túsimde kórdim» degen bos kúmán emes. Aktıvterdi qaıtarý týraly zańda «Qısyndy kúmándar» atty arnaıy bap bar. Sol bapta memlekettik múlikti jekeshelendirgender, elden bólek arnaıy jeńildik alǵandar nemese qylmystyq isterde, quqyq qorǵaý organdarynyń shuǵyl aqparatynda esimi atalǵandar, shetelde qylmyspen kózge túskender degen sııaqty onnan astam negiz kórsetilgen, – dedi spıker.
Úshinshiden, aktıvterdiń kólemi men olardyń zańdylyǵyna qatysty qısyndy kúmánnen bólek, tulǵanyń memlekettik bılikpen nemese ákimshilik resýrspen baılanysy bolýy qajet.
– Sonda osy úsh negizgi belgini biriktirsek, monıtorıng júrgizýdi bastaımyz. Árbir aqparatty jınap, doseni jınaqtaımyz. Al eger úsh belginiń bireýi ǵana baıqalsa, bul tulǵa nazarǵa alynbaıdy. Barlyq talap jıyntyq retinde qaralady, – dedi Nurdáýlet Súıindikov.
Podkast qonaǵynyń tolyq suhbatyn myna jerden oqýǵa bolady.
