Aktıvterdi qaıtarý, bankter máselesi: depýtattar qaraıtyn jańa zańdar belgili boldy
ASTANA. KAZINFORM – Májilis tóraǵasy Erlan Qoshanov jańa sessııada Parlament depýtattary qaraıtyn mańyzdy zań jobalary týraly málim etti.
«Prezıdent Joldaýda depýtattyq korpýstyń belsendi jumysyn erekshe atap ótti. Birqatar tapsyrma tikeleı depýtattarǵa arnaldy. Bul Prezıdenttiń kóptegen máselelerde depýtattyq korpýsqa arqa súıep, senim artatynyn kórsetedi. Sonymen birge, bul Memleket basshysynyń «Kúshti Prezıdent – yqpaldy Parlament – esep beretin Úkimet» formýlasynyń durystyǵyn ári pármendiligin dáleldeıdi. Joldaýda aıtylǵan kóptegen máseleler zańnamalyq turǵydan qoldaýdy talap etetinin kórip otyrmyz. Máselen, qoldanystaǵy Bankter týraly zań 1995 jyly qabyldanǵan. Búgingi kúnniń talaptaryna tolyq saı kelmeıdi. Sondyqtan biz Bankter týraly jańa zań qabyldaýymyz kerek. Sonymen qatar, aldymyzda elimizdiń salyq júıesin qaıta elekten ótkizý mindeti tur. Prezıdent Salyq kodeksin qabyldaý merzimin keler jylǵa uzartty. Bul sheshim asyǵystyq tanytpaı, kodeksti muqııat qaraýǵa múmkindik berdi», - dedi E. Qoshanov Májilistiń jalpy otyrysynda.
Bul turǵyda ol kodeksti sarapshylarmen, mamandarmen, kásipkerlermen birge taǵy da jan-jaqty pysyqtaý kerek ekenin aıtty. Salyq kodeksi ekonomıkalyq turǵydan belsendi azamattardyń barlyǵyna túsinikti bolýy kerek.
«Osy kodeks boıynsha aldymyzda aýqymdy jumys kútip tur. Oǵan barlyq depýtat, barlyq fraktsııa atsalysýy qajet. Budan basqa, biz Prezıdenttiń «Ekonomıkany yryqtandyrý jónindegi sharalar týraly» jarlyǵy aıasynda jumysty jalǵastyratyn bolamyz. «Memlekettik satyp alý týraly» zańdy qabyldaý kezinde biz bul máseleni talqyladyq. Endi osy taqyrypqa qaıta oralatyn kez keldi. Memlekettik kásiporyndardy basqarýdyń ońtaıly saıasatyn zańnamalyq deńgeıde bekitý qajet bolady. Osy sessııada biz aktıvterdi qaıtarý boıynsha zańnamany jetildirýge baǵyttalǵan jumysty jalǵastyramyz. Qaıtarylǵan qarajat ta, aktıvter de Qazaqstan halqynyń ıgiligine jumys isteýi qajet. Ol úshin el ekonomıkasyna qarajat salý – kapıtalǵa amnıstııa jasaýdyń mindetti sharty bolýǵa tıis. Bul – Prezıdenttiń berik ustanymy, biz ony normatıvti túrde bekitýimiz kerek. Joldaýdyń basym bóligi qoǵamnyń naqty qajettiligi men suranystaryna negizdelgenin atap ótken jón», - dedi Májilis tóraǵasy.
Sonymen qatar ol depýtattar jaz aılarynda óńirlerde halyqpen kezdeskenin eske saldy.
«Prezıdent aıtqan máseleler jurshylyqty tolǵandyryp júrgenin bilemiz. Sonyń ishinde sońǵy jyldary jol apattarynyń artýy, sonyń saldarynan adamdardyń opat bolýy, ásker qatarynda jarǵyǵa saı kelmeıtin zańsyzdyqtardyń jıilep ketýi halyqty alańdatyp otyr. Zańnamany qatańdatqanymyzǵa qaramastan, halyq arasynda esirtki tutyný áli de qıyn másele bolyp qalýda. San túrli órshigen alaıaqtyq árekettermen halyq kún saıyn derlik ushyrasyp jatyr. Osy máselelerdi sheshýge depýtattyq korpýs – biz atsalysýymyz kerek. Endi memlekettik organdarmen birlesip, eń aldymen zań men quqyqtyq tártipti saqtaýǵa baǵyttalǵan jumysty jalǵastyrýǵa tıispiz. Prezıdent óz Joldaýynda 2025 jyldy Jumysshy mamandyqtar jyly dep jarııalady. Bul – óte mańyzdy qadam. Óıtkeni, elimizde ınjenerler, qurylysshylar, bıologtar, veterınarlar, sý salasy mamandary tapshy. Qazir bizge zaýyt, jol, úı salatyn kadrlar kóbirek qajet. Sondyqtan biz olardy zańnamalyq turǵydan qoldaý máselesin de qarastyrýymyz kerek. Aldaǵy ýaqytta osy taqyrypqa arnap Úkimet saǵatyn ótkizgen jón dep sanaımyn. Sonymen qatar, jumyskerlerdiń osyndaı sanatyn jeke memlekettik nagradamen marapattaý eleýli yntalandyrý bolmaq. Biz – depýtattar Prezıdenttiń bul ıdeıasyn óz tarapymyzdan zańnamalyq deńgeıde qoldaıtyn bolamyz», - dedi Erlan Qoshanov.
Munymen qosa ol tsıfrlandyrý jáne jasandy ıntellektini engizý jumysy da odan ári jalǵasatynyn aıtty. Osy oraıda Májiliste jasandy ıntellektini damytý jónindegi zań jobasy ázirlenip te qoıdy. Jaqyn arada jobany talqylaý bastalady. Sonymen birge, bıylǵy kúzde depýtattar kıberqaýipsizdik máseleleri boıynsha zań jobasyn jáne Tsıfrlyq kodeksin qaraıdy.
«Búgingi kúni eń kóp talqylanyp jatqan másele – Atom elektr stansasyn salý máselesi. Atom elektr stansasyn salý týraly sheshim – serpindi joba ekeni sózsiz. Buǵan oń halyqaralyq tájirıbe aıqyn dálel bola alady. Biraq atalǵan máseleni túpkilikti sheshý úshin búkil qoǵamnyń birigýi qajet. 6 qazanda ótetin referendýmda halyq óz sheshimin qabyldaıdy», - dedi Májilis tóraǵasy.
