Aktıvterdi qaıtarý: Arnaýly memlekettik qorǵa 176,3 mlrd teńge tústi
ASTANA. KAZINFORM – Arnaýly memlekettik qorǵa 176,3 mlrd teńge tústi. Bul týraly Qarjy mınıstrliginiń Memlekettik múlik jáne jekeshelendirý komıtetiniń tóraǵasy Baqytbek Táshenov aıtty.
«2024 jylǵy 9 qyrkúıektegi jaǵdaı boıynsha Arnaýly memlekettik qor túsimderi – 176,3 mlrd teńge. Basqarýshy kompanııadan túsken qarajat - 5,7 mlrd teńge, onyń ishinde aktıvterdi satýdan 5,559 mlrd teńge jáne aktıvterdi basqarýdan - 141 mln teńge. Arnaýly memlekettik qordyń qarajatyn bólý ortalyq memlekettik organdardyń usynystaryn mindetti túrde Bıýdjet kodeksine sáıkes respýblıkalyq bıýdjet komıssııasynda qaraýmen júzege asyrylady. Qor qarajaty áleýmettik jáne ekonomıkalyq jobalardy qarjylandyrýǵa jumsalatyn bolady», - dedi komıtet tóraǵasy Ortalyq kommýnıkatsııalar qyzmetindegi brıfıngte.
Onyń atap ótýinshe, qor qarajaty esebinen qarjylandyrý úshin jobalardy irikteý jáne olardyń ólshemsharttaryn aıqyndaý tártibi Áleýmettik jáne ekonomıkalyq jobalardy irikteý jáne ólshemsharttaryn aıqyndaý qaǵıdalarynda aıqyndalǵan. Osy qaǵıdalarǵa sáıkes memlekettik organdar ázirlegen jobalar Ulttyq ekonomıka mınıstrliginiń ekonomıkalyq saraptamasyna jatatyn bolady. Budan ári jobalardy qor qarajaty esebinen qarjylandyrý máselesin Qarjy mınıstrligi Respýblıkalyq bıýdjet komıssııasynyń qaraýyna shyǵarady.
«Arnaýly memlekettik qor qarajatyn paıdalaný jáne monıtorıngileý tártibi qor qarajatyn paıdalaný jáne monıtorıngileý qaǵıdalarynda aıqyndalǵan», - dedi Baqytbek Táshenov.
