Aktıvter men mindettemeler týraly deklaratsııa tapsyrýdan naqty kimder bosatylady

ASTANA. KAZINFORM – Memlekettik kirister komıteti Jeke tulǵalardyń kiristerin ákimshileý basqarmasynyń bas sarapshysy Ersaıyn Kóptileýuly aktıvter men mindettemeler týraly deklaratsııa (250-SEN) tapsyrýdan naqty kimder bosatylatyndyǵyn málimdedi.

«Shetelde jyljymaıtyn múlki jáne kóligi, sheteldik bankterdegi banktik esepshottarda 3,7 mln teńgeden (1 000 AEK) astam somadaǵy aqshasy, ınvestıtsııalyq baǵaly metalldary, sheteldik kompanııaǵa qatysý úlesi, turǵyn úı qurylysyna qatysý úlesi, tsıfrlyq aktıvteri, debıtorlyq/kredıtorlyq bereshegi, sonymen qatar shetelde quny 1 000 AEK-ten asatyn buıymy bolmaǵan jaǵdaıda olar 250 salyq eseptiligi nysanyn tapsyrýdan bosatylady. ıAǵnı, shetelde múlki joq adamdarǵa deklaratsııa tapsyrý mindetti emes», - dedi Ersaıyn Kóptileýuly.

Onyń atap ótýinshe, shetelde múlki bar Qazaqstan azamattary, deklaratsııany óz erkimen usynǵysy kelgender, saılanbaly laýazymǵa, memlekettik laýazymǵa ornalasýǵa úmitkerler jáne olarǵa teńestirilgen kandıdattar, bankterdiń, baǵaly qaǵazdar naryǵynyń, saqtandyrý uıymdarynyń iri qatysýshylary bolatyn jeke tulǵalar deklaratsııany jyl saıyn tapsyrady. Munan bólek, Kirister men múlikter týraly deklaratsııany (270-SEN) osy ýaqytqa deıin tapsyryp kelgen sanat aldaǵy ýaqytta da mindetti bolyp qala beredi.

«Qazaqstanda ne bolmasa shetelde ózindik quny 20 000 AEK-ten (74 mln teńge) asatyn múlik satyp alǵandarǵa 270-nysanyn tapsyrý mindetti bolady», - dedi ol.

Búgin Úkimet otyrysynda Qarjy mınıstri Mádı Takıev deklaratsııa tapsyrýdan bosatylatyn sanatty ataǵan edi.

Osy oraıda Premer-Mınıstr Oljas Bektenov jeke tulǵalardyń aktıvteri boıynsha barlyq aqparat bar ekenin atap ótken bolatyn.

Aıta keterligi, buǵan deıin Prezıdent deklaratsııalaýǵa qatysty máseleni jan-jaqty pysyqtaýdy tapsyrdy.