Aktıvter esebinen qaıtarylǵan zergerlik buıymdar qaıta satylymǵa qoıylady
ASTANA. KAZINFORM – Qaıtarylǵan aktıvter esebinen alynǵan zergerlik buıymdar qaıta satylymǵa qoıylady.
«Qaıtarylǵan aktıvterdi basqarý kompanııasy» JShS 2025 jylǵy 24 shildede saǵat 12:00-de E-Qazyna veb-platformasynda baǵany kóterý arqyly qaıtalama elektrondyq aýktsıon ótetinin habarlaıdy.
Satylymǵa 56 zergerlik buıym qoıylady.
– Aýktsıonǵa qatysý úshin E-Qazyna platformasynda tirkelip, kepildik jarnany tólep, belgilengen merzimde ótinim berý qajet. Saýda onlaın formatta ótedi, ıaǵnı kez kelgen jerden qatysý múmkindigi bar. Kompanııa ashyqtyq pen aıqyndyq qaǵıdattaryn ustana otyryp, aktıvterdiń quny týraly tolyq aqparatpen qamtıdy, - delingen habarlamada.
Satylymǵa shyǵarylatyn lottarǵa kelsek, bastapqyda 55 mln teńgege satylǵan Van Cleef & Arpels alqasy bar. Bul joly alqa 38,5 mln teńgege ótýi múmkin. Áshekeı buıym aq altynnan jasalǵan jáne jalpy salmaǵy 16,92 karat bolatyn gaýhartaspen bezendirilgen.
Sondaı-aq DE BEERS syrǵasynyń baǵasy tómendepti, ıaǵnı 158 mln teńgeden 110 mln teńgege túsken. Aq altynnan jasalǵan syrǵanyń jalpy salmaǵy 6,06 karat bolatyn gaýhartaspen kómkerilgen.
Odan bólek, baǵasy 214 mln teńgege baǵalanǵan Ulysse Nardin Classic 789-80 markaly saǵaty áli satylǵan joq. Atalǵan lot boıynsha aýktsıon 31 shildede ótedi, bastapqy baǵa – 150 mln teńge.
Eske salaıyq, satylymǵa qatysty qosymsha aqparat alyp, aýktsıonǵa qatysý úshin E-Qazyna platformasynda jarııalanǵan sharttarmen tanysý múmkindigi bar.
Aıta keteıik, qaıtarylǵan aktıvter kompanııasy Almaty oblysy men Almaty qalasynda bes jer ýchaskesin satylymǵa qoıyp otyr.
Sondaı-aq elimizde qaıtarylǵan aktıvter qarajaty esebinen 400-den astam áleýmettik nysan salynyp jatyr.