Aktıvti májbúrlep qaıtarý men kelisim arqyly qaıtarýdyń aıyrmashylyǵy nede

ASTANA. KAZINFORM – Bas prokýratýra janyndaǵy Aktıvterdi qaıtarý komıtetiniń tóraǵasy Nurdáýlet Súıindikov zańsyz ıemdelgen aktıvterdi óz erkimen qaıtarý ıesine qandaı artyqshylyq beretinin eske saldy.

Onyń sózinshe búginge deıin qaıtarylǵan aktıvtiń basym bóligi erikti túrde, ekijaqty kelisim negizinde memleket menshigine ótken.

— Erikti qaıtarýdyń artyqshylyǵy teńquqyly kelisim protsedýralar qoldanylatynynda. ıAǵnı, eki taraptyń áriptestigi naqty sharttarmen belgilenedi. Mysaly, májbúrlep qaıtarý tásilinde zańsyz ıemdeldi dep eseptelgen múliktiń bári túgel memleketke ótýi kerek. Al erikti túrde qaıtarǵan kezde múliktiń bir bóligi ıesinde qalýy múmkin. Ondaı sheshimdi komıssııa qabyldaıdy, — dedi ol Kazinform agenttigine bergen eksklıýzıv suhbatynda. 

Komıtet basshysy múlikti erikti qaıtarýdyń taǵy bir joly bar ekenin aıtady. Ol joldy tańdaǵandar memlekettiń usynysyn nemese talabyn kútpeı-aq, óz erkimen áleýmettik mańyzy bar jobalardy óz qaltasynan iske asyrýǵa kirisip te ketken. 

Zańsyz aktıvterdi qaıtarý týraly zań kúshine engennen beri bul iste «negizsiz baıý» negizdemesi boıynsha ister qozǵala bastaǵan bolatyn. 

— Osyndaı istiń biri sotqa túsken boıda jaýapker tarap birden bizdiń talappen kelisip, múlikti memleketke qaıtardy. Qalǵan eki iste májbúrlep qaıtarý tásili aıaǵyna deıin qoldanyldy. Onyń bireýi boıynsha sot sheshimimen 5 mlrd teńge tolyq qaıtaryldy. Ekinshi istiń sheshimin apellıatsııalyq sot qarap jatyr, — dedi Bas prokýratýra ókili.