Akterlerdiń mansaby kóbine sátsiz aıaqtalady - zertteý
NUR-SULTAN. QazAqparat - Zertteýshiler toby 2,4 mln kıno jáne telearna akteriniń ómirine taldaý jasady, dep jazady Avstrııanyń Der Standard basylymy.
«Kúrdeli júıeler teorııasyn zertteý ortalyǵynyń ǵalymy Vıto Latora bastaǵan bir top zertteýshiler toby men London ýnıversıtetiniń mamandary kınematorafııa málimetteri jınalǵan halyqaralyq bazadaǵy 1,5 mln akter men 900 myń aktrısanyń ómirin saraptaǵan. Zertteýshiler 1888 - 2016 jyldar aralyǵyndaǵy kezeńdi qarastyrǵan», dep jazady basylym.
Avtordyń aıtýynsha, kıno men telearna paıda bolǵaly naǵyz juldyzdar óte az, al jyldam sóngen meteorıtter kóp bolǵan. «Ǵalymdar nysanyna ilikken akterlerdiń 90%-y jumyssyz bolsa, 2%-y ǵana óz mamandyǵymen tabys tapqan. Akterlerdiń 70%-nyń mansaby bastalǵan jyly-aq aıaqtalyp otyrǵan. Al basqalarynda jyl saıyn quldyraý kezeńi bolǵan», dep jazady avtor.
Zertteýshilerdiń aıtýynsha, ekrannan jıi kórinip júrgen akterdiń jańa jumysqa shaqyrtý alý múmkindigi kóp bolady.
«Akter mamandyǵynda jıyrma jyldan astam ýaqyt júrgen adamdardyń eń sátti kezeńi mansabynyń basyna tuspa tus keledi. Ǵalymdardyń aıtýynsha, statıstıka derekteri arqyly akterdiń mansabynyń qandaı kúıde ekenin 85 paıyzdyq dáldikpen anyqtaýǵa bolady. Degenmen, statıstıka ekrannan joǵalyp ketken adamdardyń qaıta oralýyn naqty aıta almaıdy. Zertteýshiler alǵan málimetter de mundaı jaǵdaılardyń óte sırek kezdesetinin kórsetip otyr», dep jazady avtor.
