Akter Jan Klod VanDamm qos qoly joq qazaq sýretshisine alǵys aıtty

QARAǴANDY. QazAqparat – Amerıkalyq akter, rejısser jáne túrli trıýktardy qoıýshy Jan-Klod Van Damm qaraǵandylyq sýretshi Káripbek Kúıikovke suńqar qus beınelengen kartınasy úshin alǵys aıtty, dep habarlaıdy QazAqparat tilshisi.

«Ótken jyly Dýbaıdaǵy EKSPO kórmesi aıasynda meniń jeke kórmem ótti. Keıin onda ózimniń birneshe jumysymdy qaldyrdym. Jaqynda Van Damm sonda kelgen. Dýbaıda ol suńqarlar týraly fılm túsiredi. Van Damm qazaqstandyq pavılonda bolǵan kezde Dáýit Shaıhıslamov, Álıhan Jarylǵapov pen Ermekjan Ósipbekov oǵan men týraly aıtyp, vıdeo kórsetken eken. Sodan keıin olar maǵan qońyraý shalyp, oǵan sýretimdi berýge ruqsat surady. Men qýana-qýana kelistim. Men úshin bul úlken qurmet. Mine, Van Damm maǵan arnap vıdeo jazdy. Onda ol men sııaqty sýretshimen tanysyp, meniń jumysymdy kórsetkenin aıtty. Men óz kýmırimniń nazaryna ilikkenime óte qýanyshtymyn», – dedi Káripbek Kúıikov.

Jan-Klod Van Damm óziniń vıdeohabarlamasynda qazaqstandyqtarǵa sálem joldap, sýretshige alǵys aıtady. Onyń sózinshe, sýretshiniń eńbekteri tańǵaldyrarlyq.

Káripbek Kúıikov – erni men aıaq saýsaqtarynyń kómegimen kartınalar salatyn qaraǵandylyq sýretshi, Halyqaralyq antııadrolyq qozǵalystyń belsendisi. Ol Semeı ıadrolyq polıgonyndaǵy synaqtar saldarynan qos qolsyz dúnıege kelgen.