Akter úshin jaǵymsyz keıipker bolmaıdy

Ákemteatrdyń tórindegi spektaklderde birde jaǵymdy, keıde jaǵymsyz rólderdi somdap júrgen, kezinde «Qazaqstan» Ulttyq arnasynan júrgen «Qymyzhana» habarynyń sánin keltirgen, kınoda ózindik qoltańbasymen erekshelenetin daryndy aktrısalardyń biri - Aızada Satybaldıeva. Onyń atasy Satybaldy óz zamanynda Ońtústik óńirine tanymal aqyn kisi bolsa, al, anasy aýyldaǵy toı-tomalaqtyń sánin keltirip júretin ánshi bolǵan. «Otbasynda jaı otyrystyń ózin otyra qalsaq dýmanǵa aınaldyryp, úı-ishin syrnaı sazy kernep, dombyra qyly terbep ketetin edi. Búgingideı zaman bolsa, ata-anamnyń ónerde jetken jetistikteri kóp bolar edi», - deıdi aktrısanyń ózi.

Bala kúninen-aq ónerge qushtar ósken Aızada mektebi, aýylynyń namysyn qorǵap aýdandyq, respýblıkalyq baıqaýlarǵa qatysyp, daryndylar dodasynan dara shyqqan kezi az emes. Aıtýynsha, túrli qoıylymdar qoıyp, kontserttik baǵdarlamalardyń bel ortasynda júretin ol únemi aldyńǵy qatardan kórinetin.

Ońtústik óńirinen arman qýyp Almatyǵa kelgen balaýsa boıjetken úshin Óner ınstıtýyna oqýǵa túsý de sonshalyqty qıyndyq týdyra qoımaǵanǵa uqsaıdy. Ol óziniń ustazdary Káýken Kenjetaev, Esim Segizbaev aǵalaryn árqashan maqtan tutqandyǵyn jetkizdi.

Oqýdy támamdar kezdegi dıplomdyq spektaklderin kórgen sol kezdegi Astana teatrynyń kórkemdik jetekshisi, rejısser Qadyr Jetpisbaev jas qyzdy Astanaǵa shaqyryp, Jastar teatrynan qyzmet usynǵan. Ol jaqta Ǵ.Músirepovtiń «Qyz Jibeginde» Jibek, «Qozy Kórpesh - Baıan sulýynda» Baıan, M. Áýezovtiń «Qara qypshaq Qobylandysynda» Qurtqa, «Eńlik-Kebeginde» Eńlik, Q. Shańǵytbaev, Q. Baıseıitovtiń «Beý, qyzdar-aıynda!» Jansulý, Ánes Saraıdyń «Balýan Sholaǵynda» Tatıana, F.Erveniń «Túlki bıkeshinde» Denıza, S.Ahmadtyń «Kelinder kóterilisinde» Nıgora, M.Faızıdiń «Bashmaǵymynda» Sárýar obrazdary buıyrǵan. «2000-jyly Ázirbaıjan Mámbetov «Qyz Jibek» qoıylymyn sahnalady. Rejısser basty rólge meni tańdady. Alǵash bul qoıylymdy Elbasynyń ózi arnaıy kelip, tamashalady. Dál sol jyldy Memleket basshysy «Óner jyly» dep jarııalaǵan bolatyn. Elbasy sol sátte bizdiń teatrdyń biraz ártisterine óz qolymen páterdiń kiltin tabystaǵan edi», - deıdi aktrısa.

Birqatar óner adamdary Alataý baýyrynan Astanaǵa qaraı aǵylyp jatqanda Aızada Almatysyna qaıta oraldy. Úırenispegendikten emes, Astanaǵa qyzmet usynǵanda úlken qoldaý bildirgen ómirlik seriginiń kóńili úshin. Joldasy da óner aýylynan alys emes. Qazaqtyń beldi aqyndarynyń biri - Baqyt Bedelhan. «Astana teatryna shaqyrtý alǵanymda ustazdarym Baqyttyń «Astanaǵa aparamyn» degen bir aýyz ýádesin alǵan. Birge bardyq. Jaman bolǵan joqpyz. Qazirgideı emes, ol kezde Astanada aqyndardyń qarasy az edi. Shyǵarmashylyq ıeleriniń basym bóligi Almatyda bolatyn. Baqyt ádebı ortasyn saǵyndy. Sosyn aqyldasyp, Almatyǵa qaıta qonys aýdardyq» - dedi ol.

Almatyǵa oralǵannan keıin ákemteatrǵa jumysqa ornalasqan aktrısaǵa bul jerden de biraz rólder buıyrdy. M.Áýezovtiń «Karagózinde» ósekshi áıel, «Qıly zamanynda» qarajaýlyqty ana, T.Nurmaǵanbetovtiń «Qojanásir tiri ekeninde» Zúleıha, D.Isabekovtiń «Jaýjúreginde» Elızaveta, M.Sársekeniń «Tenderge túsken kelinsheginde» kezbe áıel, Á.Ámzeulynyń «Qara kempirinde» jeńge, Á.Rahımovtiń «Qylmyskerge kýáliginde» Uzynetek, S.Asylbekovtiń «Imperııadaǵy» keshinde» Nursulý, Ú.Ǵadjybekovtiń «Arshyn mal alanynda» Gúlchahra, N.Gogoldiń «Úılenýinde» Arına, Q. Ysqaq pen Shahımardenniń «Qazaqtarynda» Mıhr hanym, R. Muqanovanyń «Máńgilik bala beınesinde» Uzynǵaısha, I. Ǵaıyptyń «Men ishpegen ý bar ma?...» rekvıeminde Nurǵanym, T.Ábdikovtiń «Uly men Urysynda» jýrnalıst qyz rólderin sátti somdap shyqty. Osylardyń ishindegi «Imperııadaǵy keshte» Toıboldynyń jary Nursulý obrazy kórermen úshin jaǵymsyz keıipker bolsa da, aktrısa ony ózinshe aqtaıdy. «Kórermen Nursulýdy jylpos, kóp sóıleıtin jaǵymsyz keıipker retinde tanıdy. Biraq, men úshin olaı emes. Ártis óziniń rólin jaqsy kórý kerek. Meıli, ol jaǵymsyz keıipker bolsa da. Róldi súımeseń, ony laıyqty deńgeıde alyp shyǵa almaısyń. «Zamanyń túlki bolsa tazy bop shal» deıtin maqal dál Nursulýǵa qatysty aıtylǵan. Bala-shaǵasyn asyraý, zaman qıyndyǵyna qarsy turý úshin túrli qıturqy amaldarǵa barady. Ony bul keıipke ómirdiń ózi ákelip otyr. «Berseń qolyńnan, bermeseń jolyńnan» degen qaǵıdany berik ustanatyn ol adal eńbekten góri, bárin qýlyqpen, aıla-amalmen taýyp ketkendi jón kóredi. Osy minezimen de kandıdattyǵyn qorǵap, biraz jetistikke jetken jáne aınalasyndaǵylarǵa kóp bıikti baǵyndyra alatynyn dáleldegen. Arynyń aldynda ózin kinálamaıdy», - deıdi aktrısa. Keıde sol jaǵymsyz keıipkerdiń ózinen akterdiń ózi ǵana emes, kórermen de jaqsy qasıetin izdeı bilý kerektigin aıtady.

Taǵdyr tartý etken talantty eńbekpen ushtastyrý arqyly bıik dárejege shyǵarýǵa bolady degen qaǵıdany ustanatyn aktrısa adal eńbektiń arqasynda eńbegi elenip, ónerge adal qyzmet etip, esimi el esinde saqtalǵan biraz teatr tarlandarynyń ómir jolyn úlgi tutyp keledi. Al, oınaǵan keıipkerinen jaqsyny jaqsy dep tanýǵa, jamandy jaman dep tanýǵa úırendi.