Akter Nursultan Jaqsygen 2 jyl 3 aıǵa sottaldy
ALMATY. KAZINFORM — Almaty oblysynyń Qarasaı aýdandyq soty akter ári shoýmen Nursultan Jaqsygenge qatysty úkim shyǵardy.
Qarasaı aýdandyq sotynda Qylmystyq kodeksiniń 274-baby 2-bóliginiń 3-tarmaǵy «Mass-medıany, telekommýnıkatsııa jelilerin jáne onlaın-platformalardy paıdalana otyryp kórineý jalǵan aqparat taratý» boıynsha is qaraldy.
— Nursultan Jaqsygen jáne jábirlenýshi Farıza Sabyrálıeva azamattyq nekede turǵan, olardyń kámeletke tolmaǵan eki ortaq balasy bar. 2024 jylǵy 14 sáýirde olar birge turýdy toqtatqan, — delingen Almaty oblystyq sot habarlamasynda.
Іs materıaldaryna sáıkes, akter ajyrasqannan keıin áleýmettik jelilerde jábirlenýshiniń ar-namysy men qadir-qasıetine nuqsan keltiretin kórineý jalǵan málimetter taratty.
Jábirlenýshiniń málimdeýinshe, er adam onyń mazasyn alyp, «jeńil júristi», «syǵan» dep mazaq qylǵan. Áleýmettik jelilerde ol týraly qısynsyz málimdemeler jasaǵan.
Al sottalýshy kinásin moıyndamaı, onyń akkaýntynan ózge adam jazǵanyn aıtyp aqtaldy.
Sot Nursultan Jaqsygendi kináli dep tanyp, 2 jyl 3 aı merzimge bas bostandyǵynan aıyrdy. Sondaı-aq 5 jylǵa blogerlik jáne ózge de jarııa aqparattyq qyzmetpen aınalysý quqyǵynan aıyryldy.
Úkim jarııalanǵannan keıin akter sot zalynda qamaýǵa alyndy.
Jaqsygen jazasyn qaýipsizdigi ortasha qylmystyq-atqarý júıesi mekemesinde óteıdi.
Onymen qosa, sot jábirlenýshi Farıza Sabyrálıevanyń azamattyq talabyn ishinara qanaǵattandyryp, onyń paıdasyna 5 mıllıon teńge óndirip berýdi mindettedi.
Eske salaıyq, buǵan deıin Qurt laqap atymen belgili reperdiń ústinen qylmystyq is qozǵalǵan edi.
Sondaı-aq Almatyda áleýmettik jelide balaǵat sóz aıtqan birneshe bloger jazalandy.
