Akter bolamyn dep armandamadym, mańdaıyma jazylypty – Sáken Qalymov

ASTANA. KAZINFORM – Muhtar Áýezov beınesin ekranda somdaǵan tanymal ánshi, kompozıtor Sáken Jaqsylyquly Jibek Joly telearnasynyń «Búgin LIVE» baǵdarlamasynda róldi qalaı qabyldaǵanyn aıtyp berdi.

– Muhtar Áýezovtiń rólin somdaý men úshin asa qıyn bolǵan joq. Sebebi, kamera men kópshilikke úırengen adammyn jáne kóp adam meniń syrt kelbetimdi jazýshyǵa uqsatady. Maǵan habarlasyp, «Muhtar Áýezovtiń tulǵasyna arnap túsirilip jatqan fılmge qatysasyz ba?» degende, qýanyp kettim, – dedi ol.

Sáken Jaqsylyqulynyń aıtýynsha, túsirilim kezinde sahnalyq kıim de, mátin de sol dáýirge saı tańdalǵan.

– Túsirilim alańyna barǵan bette aldymda otyrǵan eki qyz: «Mynaý Áýezovtiń ózi ǵoı» dep qaldy. Bul róldi alyp shyǵý asa qıyn bolǵan joq, tek Áýezovtiń sózderin jattaý sál kúrdelileý boldy. Ol kóshe tili emes, kórkem, baı ádebı til. Sony sezinip, durys jetkizý qajet boldy, – deıdi ol.

Óner ıesi akter bolý bala kúngi armany bolmaǵanyn, alaıda taǵdyr joly ony dál osy rólmen ekranǵa ákelgenin atap ótti.

– Serıal jyldyń úzdik serıaly atanyp, «Tumar» júldesin jeńip aldy. Bul men úshin úlken abyroı. Akter bolamyn dep armandaǵan qazaq emes edim, sóıtsem mańdaıyma solaı jazylǵan eken, – dep túıindedi Sáken Jaqsylyquly.

Buǵan deıin Sáken Jaqsylyquly ««Búgin LIVE» baǵdarlamasyna bergen suhbatynda shyǵarmashylyǵy men fonogrammaǵa qatysty kózqarasyn bildirgen edi.