Akter Anatolıı Krejenchýkov dúnıeden ótti

ASTANA. KAZINFORM —  Mádenıet jáne aqparat mınıstrligi Qazaqstan Respýblıkasynyń eńbek sińirgen qaıratkeri, akter Anatolıı Krejenchýkovtyń dúnıeden ótýine baılanysty kóńil aıtty. 

Qazaqstan Respýblıkasynyń Mádenıet jáne aqparat mınıstrligi Qazaqstan Respýblıkasynyń eńbek sińirgen qaıratkeri, akter Anatolıı Krejenchýkovtyń dúnıeden ótýine baılanysty onyń týǵan-týystaryna, jaqyndaryna, áriptesterine jáne búkil teatr qaýymdastyǵyna qaıǵyra kóńil aıtady.

Onyń shyǵarmashylyq joly 1973 jyly bastaldy. Qurmanǵazy atyndaǵy Óner ınstıtýtynyń akterlik fakýltetin támamdaǵannan keıin ol Lermontov atyndaǵy teatrǵa qabyldanyp, qyryq jyldan astam ýaqyt boıy teatr sahnasynda óner kórsetti. 

Osy jyldar ishinde ol júzden astam róldi somdady. Sondaı-aq kópshilik kórermenge «Perekrestok» telehıkaıasyndaǵy róli arqyly da keńinen tanyldy.

— Ol orys teatr óneriniń damýyna jáne klassıkalyq mektep dástúrleriniń saqtalýyna zor úles qosty. Onyń prıntsıpshildigi men talapshyldyǵy áriptesteri úshin, ásirese jas akterler úshin úlgi boldy.

Anatolıı Nıkolaevıchtiń jarqyn beınesi týǵan-týystarynyń, áriptesteriniń jáne kórermenderdiń júreginde máńgi saqtalady.

Marqumnyń otbasyna jáne osy qaıǵyny birge bólisip otyrǵan barsha jandarǵa shynaıy kóńil aıtamyz, — delingen habarlamada. 

Aıta ketelik 8 qańtarda Belgili akter Murat Bısembın ómirden ótken edi.