Aktaý–Shymkent reısinde bomba baryn aıtqan áıel psıhonevrologııalyq dıspanserde esepte tur — polıtsııa

ASTANA. KAZINFORM – Aqtaý áýejaıynda rezonansty oqıǵa boldy.  «Scat» áýe kompanııasynyń Aqtaý–Shymkent reısiniń jolaýshysy ushaqta jarylǵysh zat baryn habarlap, saldarynan shamamen 200 adam shuǵyl evakýatsııalandy, al arnaıy qyzmet ókilderi ushaqty tekserdi, dep habarlaıdy agenttiktiń tilshisi.

Áýejaı qyzmetkerleri men polıtsııanyń málimetinshe, bortta 27 jastaǵy áıel sábıimen birge bolǵan. Ol ushaq qonǵannan keıin osyndaı málimdeme jasaǵan. Júrgizilgen muqııat tekseristen keıin jarylǵysh zat tabylǵan joq.

Jolaýshy ustaldy. Mańǵystaý kóliktegi polıtsııasy áıelge qatysty «terrorızm aktisi týraly kórineý jalǵan aqparat taratý» babymen qylmystyq is qozǵady.

— Tergeý jalǵasyp jatyr. Qylmystyq is júrgizý kodeksiniń 201-babyna sáıkes ózge málimetter jarııalanbaıdy, — dep habarlady vedomstvo.

Sonymen qatar Mańǵystaý stantsııasy jelilik polıtsııa bóliminiń aǵa ınspektory Rahym Orynbaev áıeldiń psıhonevrologııalyq dıspanserde esepte turǵanyn aıtty.

— Kórineý jalǵan terrorızm aktisi týraly habarlama faktisi boıynsha qylmystyq is qozǵaldy. Qazirgi ýaqytta tergeý júrgizilip jatyr. Áıel psıhonevrologııalyq esepte tur, — dedi ol. 

Aıta ketelik Astana, Almaty, Shymkent jáne Aqtóbe áýejaılary álemdik deńgeıdegi mýltımodaldy ortalyqtarǵa aınalady.