Aqtaýlyq stýdentter Túrkııada ótken halyqaralyq olımpıadadan júldemen oraldy
ASTANA. QazAqparat - Túrkııanyń Antalııa qalasynda mektep oqýshylary men stýdentterdiń IX Halyqaralyq olımpıadasy ótti. Onda Mańǵystaý oblystyq týrızm kolledjiniń stýdentteri baq synady. Bul týraly Mańǵystaý oblystyq bilim basqarmasyna silteme jasap, tumba.kz habarlady.
Olımpıadany Antalııanyń týrızm akademııasy qala ákimdiginiń qoldaýymen uıymdastyrdy. Atalmysh shara oqýshylar men stýdentterdiń boıyndaǵy shyǵarmashylyq erekshelikteri men olardyń ǵylymı-zertteý qyzmetine degen qyzyǵýshylyǵyn anyqtaý maqsatynda uıymdastyrylǵan. Shara sonymen qatar tildi meńgerý, matematıka, týrızm salalary boıynsha ózara bilim almasý, túrli memleketterdiń oqýshylary men stýdentteri arasyndaǵy mádenı baılanystardy damytýǵa baǵyttaldy.
«Bıylǵy jyly elimizdiń namysyn Mańǵystaý oblystyq týrızm kolledjiniń 7 stýdenti qorǵady. Olar jalpy bilim berý pánderi men týrızm boıynsha ózara baq synasty. Baıqaýdaǵy jumystar jeke jáne komandalyq bolyp baǵalandy»,-dep túsindirdi bilim basqarmasynyń baspasóz qyzmetindegiler.
Olımpıadanyń qorytyndysy boıynsha, jeke esep boıynsha mańǵystaýlyq stýdentter úsh júldeli oryndy jeńip aldy. Úzdikterdiń qatarynan Asqar Bımaǵambetov, Shattyq Tilektesova men Áıgerim Bekbosynova tabyldy. Olarǵa medaldar men gramotalar tabystaldy.
