Aqtaýlyq stýdentter memlekettik basqarý isine aralasa bastady
Qalanyń basty da ózekti máseleleri talqylanatyn kezekti jıyn Kaspıı memlekettik tehnologııalar men ınjınırıng ýnıversıtetinde ótti. Kún tártibindegi máselelerdi talqylaýǵa qala ákimdigine qarasty memlekettik mekeme basshylarymen qatar, stýdentter de qatysty. Osylaısha, keleshekte memlekettik basqarý isin qolǵa alatyn jastardyń teorııa men tájirıbeni ushtastyrýyna múmkindik jasaldy.
«Budan bylaı biz aıyna eki ret jınalysty osylaı ótkizemiz. Basty maqsatymyz - stýdentterdi memlekettik qyzmetke etene aralastyrý. Olar qaladaǵy ózekti máselelerdi bilip, qalaı sheshiletinin kórýi tıis. Óıtkeni, osy stýdentter - bizdiń izimizdi basatyn bolashaq mamandar ári basshylar», - deıdi Aqtaý qalasynyń ákimi Nurdaýlet Qılybaı.
Apparattyq jıynǵa qatysýǵa múmkindik alǵan jastar jańa bastamany qýana qabyldady.
«Biz úshin bul - keremet tájirıbe boldy. Qalanyń problemalarymen tanystyq jáne olardy sheshý úshin qandaı jumystar atqarylatynan bildik», - deıdi ýnıversıtet stýdenti Aslanbek Muhamedınov.
Atap aıtqanda, jınalysta kásipkerlik, týrızmdi damytý jáne qoǵamdyq tártip máseleleri sóz boldy. Sonyń ishinde, qala ákimi jastar arasynda beleń alyp turǵan nashaqorlyq máselesine toqtaldy. Osy oraıda, qalalyq polıtsııa basqarmasynyń ókilderi jastardy esirtkimen kúres baǵytynda birlese jumys isteýge shaqyrdy.
Eske sala ketsek, Bilim jáne ǵylym mınıstrligi joǵary oqý oryndarynan talap etiletin birqatar qujattyń qysqarǵanyn málimdegen edi.
