Aqtaýlyq polıtseıler túngi reıd kezinde toıdyń ústinen tústi

AQTAÝ. QazAqparat - Aqtaýda karantın tártipterin óreskel buzyp, toı jasaǵandar jazalandy, dep habarlaıdy QazAqparat tilshisi oblystyń qoǵamdyq kommýnıkatsııa ortalyǵyna silteme jasap.

Mańǵystaý oblysynyń Polıtsııa Departamenti jergilikti polıtsııa qyzmetiniń mamandary men qoǵamdyq kommýnıkatsııa ortalyǵynyń túsirilim toby Aqtaý qalasynyń meıramhanalaryna reıd júrgizdi.

Reıd kezinde «Aqsuńqar» meıramhanasynda 50 adamǵa arnalǵan toı ótip jatqany anyqtaldy. Elde jarııalanǵan karantın rejımine qulaq aspaı, kópshilikti jınaǵan kásipkerge Aqtaý qalalyq polıtsııa bóliminiń ınspektorlary QR ÁQBtK 425 baby boıynsha hattama toltyryp, 230 AEK kóleminde aıyppul saldy.

«Sanıtarlyq erejelerdi buzǵan meıramhana ákimshiligimen ári qaraı tıisti jumystar júrgiziledi. Reıd jalǵasady», - dedi Mańǵystaý oblysy polıtsııa departamentiniń jergilikti polıtsııa qyzmeti basqarmasy basshysynyń m. a. Qaldymurat Aıǵaraqov.