Aqtaýlyq oqýshy oıyn qýǵan balalardyń qımyl-qozǵalysynan energııa óndirýdiń jolyn tapty
Erlan Turaly - Aqtaýdaǵy xımııa-bıologııa baǵytyndaǵy Nazarbaev zııatkerlik mektebiniń 9-synyp oqýshysy. Kishkentaı kezinen energııa óndirý, jel dıirmenderiniń, kún energııasynan qýat alatyn qurylǵylardyń jumysyna qyzyǵyp ósken. Bul jobany jasaýǵa bir jyl ýaqytyn sarp etipti.
«Men ony «Tabıǵı balamaly energııalar parki» dep ataımyn. Ol qalaı jumys isteıdi? Balalar alańyndaǵy átkenshekterge kún batareıasy men jel generatory ornatylady. Jelden - 540 vatt, kúnnen - 240 vatt qýat alýǵa bolady. Osylaısha, jel men kúnnen energııa óndiriledi. Sondaı-aq, balalar átkenshekke terbelip, syrǵanaǵan kezde de, ıaǵnı, mehanıkalyq qozǵalystan 120 vatt qýat ala alamyz. Jobany kez kelgen jerde jasaýǵa bolady», - deıdi jas ónertapqysh.
Joba quny - 10 mln teńge. Ol bul somanyń 5 jyl ishinde ózin aqtaıtynyna senimdi.
«Balalar alańqaıynda óndirilgen, jınalǵan qýat sol mańaıdaǵy jaryq shamdary men turǵyn úıdi elektr energııasymen qamtı alady. Oılap qarańyzshy, bastysy - únemdiligi ǵoı. Bul jerde balalar kóńil kóterip qana qoımaı, energııa óndirýge óz úlesin qosady. Ár átkenshekke arnaıy qurylǵylar qondyrylady. Barlyǵy avtomatty túrde jumys jasaıdy. Endi bul jobamdy qurylys kompanııalaryna tanystyrýdy josparlap otyrmyn. Sonymen qatar, túrli startap jarystarǵa joldaımyn. Meniń jobamnyń qurylymy qarapaıym ári paıdasy kóp. Sondaı-aq, Elbasy bastamasy boıynsha elimizdegi jasyl ekonomıkany damytýǵa úles qosatyn tıimdi joba», - deıdi Erlan Turaly.