Aqtaýlyq oqýshy órt-qutqarý sportynan eki rekord ornatty
AQTAÝ. QazAqparat - 24-30 qyrkúıek kúnderi aralyǵynda Bolgarııanyń Varna qalasynda órt-qutqarý sporty boıynsha jastar men ıýnıorlar arasynda VIII álem chempıonaty ótti. Onda Qazaqstan quramasy sapynda el namysyn qorǵaǵan 16 jastaǵy Dáýren Qusmanov ulttyq rekordy eki márte jańartty, dep habarlaıdy QazAqparat lada.kz saıtyna silteme jasap.
Ulttyq quramanyń jetistikterimen Aqtaýdyń 8-inshi Mamandandyrylǵan órtke qarsy bólimshesiniń bólim komandıri jáne D.Qusmanovtyń jattyqtyrýshysy Baqtybaı Súleımanov bólisti.
Atap aıtqanda, Qazaqstan quramasy oqý-jattyǵý munarasynyń terezesine shabýyldaý baspaldaǵymen kóterilýde úshinshi orynǵa ıe bolǵan. Al Dáýren Qusmanov bul kezeńdi 7,41 sekýndta eńserip, el rekordyn jańartty. Buǵan deıingi rekord 7,49 sekýndty quraǵan.
11-synyp oqýshysy sondaı-aq kedergilermen 100 metrge júgirý dıstsıplınasynda da erekshelendi. Onyń ýaqyty 16,47 sekýndty qurady. Bul da Qazaqstannyń jańa rekordy. Atalmysh kezeńde el quramasy besinshi orynǵa taban tiredi.
Jaýyngerlik ornalasý kezeńinde sportshylarymyz altyn júldege ıe boldy. Normatıv 20,17 sekýndta oryndaldy.
Al 4h100 metr estafetasynda jastarymyz tórtinshi boldy.
Osylaısha, Qazaqstan quramasy jalpy esepte tórtinshi oryn ıelendi.
