Aqtaýlyq muǵalim shákirtimen birge «Antıvırýs» termınalyn oılap tapty

AQTAÝ. QazAqparat - Aqtaýdaǵy F.Ońǵarsynova atyndaǵy №29 orta mektebiniń kórkem eńbek páni jáne robototehnıka úıirmesiniń muǵalimi Marat Atanazarov oqýshysy Jasulan Shańytbaımen birge «Antıvırýs termınal» qurylǵysyn oılap tapty. Bul jaıynda Aqtaý qalasy ákiminiń baspasóz qyzmetine silteme jasap QazAqparat habarlaıdy.

Jańa qurylǵy atalǵan mektepke ornatylyp, synaqtan ótkizilip jatyr.

Antıvırýs termınaly eń aldymen adamnyń dene qyzýyn ólshep, qoldy avtomatty túrde ýltradybystyq datchık arqyly zalalsyzdandyrady.

Arnaıy tetikter arqyly balalar men eresekter úshin betperde alý múmkindigi de qarastyrylyp, munda «Ashyk» qosymshasy ornatylǵan.

«Qazirgi tańda beleń alǵan koronavırýs pandemııasynan qutylýdyń birden bir joly betperde taǵyp, qolymyzdy antıseptıkpen zalalsyzdandyryp, adamdarmen qarym-qatynasty azaıtý dep dárigerler eskertip jatyr. Osyndaı termınal barlyq bilim oshaqtary men balabaqshalarda, qoǵamdyq oryndarynda tursa, indetten tezirek arylýǵa az da bolsa septigin tıgizedi dep senemin»,- deıdi Marat Atanazarov.

Termınal adam kóp shoǵyrlanatyn oryndarǵa qoıýǵa arnalǵan. Basty artyqshylyǵy - avtomattandyrylǵan.

Qurylǵyny qashyqtan baqylap, kútip- ustaý maqsatynda arnaıy beınekamera ornatylǵan.

Ónertapqyshtar jýyrda ótken «Daryn» ǵylymı jobalar baıqaýynyń oblystyq kezeńinen 1-oryn ıelenip, respýblıkalyq kezeńge joldama aldy.