Aqtaýlyq kýrs pen trenıngterge qatysty qosymsha shyǵardy

AQTAÝ. QazAqparat - Aqtaý qalasyndaǵy fızıka-matematıka mektebiniń 18 jastaǵy turǵyny Albına Jaılaýbaeva «Chance» dep atalatyn mobıldi qosymsha shyǵardy. Bul qosymsha arqyly elimizde qandaı sharalar, trenıngter men oqý kýrstary ótetinin kórip otyrýǵa bolady, dep habarlaıdy QazAqparat tilshisi.

Albına mamandandyrylǵan fızıka-matematıka mektebiniń túlegi. Ol 2020 jyly mektep bitirgen. Qazirgi ýaqytta ol Avstralııalaǵy joǵary oqý ornyna túsýge daıyndalyp júr. Ol bolashaqta kásipker bolǵysy keledi.

Ol mobıldi qosymshany qalaı jasaǵanyn jáne onyń paıdasy týraly aıtty. Bul qosymshany jasaý úshin onyń 6 aı ýaqyty ketken.

«Chance mobıldi qosymshasy arqyly qoldanýshylarǵa (jasyna nemese baǵytyna qaraı) kúndelikti elimizde bolyp jatqan jáne josparlanǵan ártúrli is-sharalar, baıqaýlar, trenıngter, olımpıadalar, konferentsııalar, dárister, jármeńkeler, sporttyq, mádenı, ǵylymı jarystar, granttar, sabaqtar, tegin jáne aqyly kýrstar týraly aqparatty jan-jaqty jınaqtap, rettep, usynyp otyratyn bolamyn. Sol is-sharalarǵa tikeleı onlaın jazylý nemese ótinimder berip, aqysyn onlaın tóleý, aýdıtorııa jınaý sııaqty kóptegen qyzmet túrin iske qosatyn bolamyn», - deıdi Albına Jaılaýbaeva.

Onyń aıtýynsha, bul qosymsha qazaqstandyqtardyń barlyǵy úshin qoljetimdi bolady. Ol bolashaqta kóptegen uıymdarmen, úkimettik emes uıymdar jáne kommertsııalyq uıymdarmen seriktestik ornatpaq. Mobıldi qosymshany App Store men Play Market-ten tegin júktep alýǵa bolady.

Atalǵan mobıldi qosymsha 2020 jyldyń naýryz aıynda iske qosylǵan. Onyń aıtýynsha, osy mobıldi qosymsha týraly ázirge jaqyndary, dostary, jáne tanystary ǵana biledi.

«Mundaı jobany qolǵa alý ońaı emes. Bastysy - qolǵa alǵan jobań men ıdeıań júzege asatynyna sený. «Caspian StartUp» sııaqty jobalarǵa qatysyp, ınvestor nemese demeýshi tabý, grant utyp alýdyń mańyzy zor», - deıdi ol.