Aqtaýlyq komanda shaǵyn fýtboldan álem chempıony atandy
Germanııada ótken chempıonatta qazaqstandyq komanda Lıvııa, Egıpet, Ýkraına quramalarymen bir topqa túsken. Іrikteý kezeńinde toptan 3-orynmen shyqqan komanda jartylaı fınalda Meksıka, fınalda Ýkraına quramalarynan basym túsken.
«Bizge eń basynda qıyn boldy. Soǵan qaramastan, ár oıynnan qorytyndy shyǵarýǵa tyrystyq. Ár komandanyń qaı jerde myqtylyǵy, qaı jerde kemshiligi bar ekenin sarapalap otyrdyq. Sońynda jeńip shyqtyq», - deıdi komandanyń bapkeri Ashat Tóretaev.
Aqtaýlyq ujym aldymen, oblystyq chempıonatta jeńimpaz atanǵan. Al, respýblıkalyq kezeńde Astanada ár óńirden jınalǵan úzdik 50-ge tarta komanda baq synaǵan. Ol jarysta da qarsylasqa shaq keltirmegen aqtaýlyq ujym álem chempıonatyna beriletin jalǵyz joldamanyń ıesi atanǵan. Osylaısha, álemdik básekede el atynan óner kórsetýge múmkindik alǵan.
