Aqtaýlyq fermer eshki sútinen túrli ónim shyǵarady

AQTAÝ. QazAqparat - Aqtaýlyq fermer Rýslan Jınkınniń qorasynda 40-tan astam eshkisi bar. Sútinen túrli ónim daıyndap, óńir jurtshylyǵyna jetkizip otyr, dep habarlaıdy QazAqparat tilshisi.

Ómirzaq aýylynyń turǵyny Rýslan Jınkınniń kásibi aýyldastaryna etene tanys. Sebebi, emdik qasıeti mol ónimge suranys kóp eken.

Aǵzaǵa sińimdi, ımmýnıtetti nyǵaıtyp qana qoımaı asqazan aýrýlaryna da paıdasy mol. Sharýa sútti zalalsyzdandyrǵannan keıin plastık qutylarǵa quıady.

Syrtyna sharýa qojalyǵynyń málimetteri kórsetilgen qaǵaz japsyrady. Daıyn ónimdi oblys ortalyǵyndaǵy bazar men dúkenderge jetkizedi.

«Meniń basty maqsatym - mal sharýashylyǵyn damytý. Qazir sútten bólek, súzbe irimshik, ıogýrt sekildi ónim túrin shyǵaramyz»,-deıdi kásipker.

Kásipkerdiń aıtýynsha, jaz aılarynda árqaısysy 2,5-3 lıtr sút beredi. Fermer budan bólek, 450-den astam qoı baǵyp otyr.

Sańyraýqulaq ósirip, ónimin daıyndaıdy. Sondaı-aq, tandyr nan pisirip, táýligine oblys ortalyǵyndaǵy dúkenderge jetkizedi.

6 adamdy jumyspen qamtyp otyr. Alǵa qoıǵan jospary kóp.

Balyq sharýashylyǵyn da qolǵa alyp, shaıan ósirý josparynda bar.