Aqtaýlyq egiz Qasym men Jomartty jurt «Prezıdent» dep ataıdy
Qasym men Jomart – úıdiń úlkeni, 2009 jyly dúnıege kelgen. Qasym 3,2 keli salmaqpen birinshi týǵan. Jomart sanaýly sekýndtarǵa kishirek, onyń salmaǵy 2,8 keli bolypty. Arttarynan ergen Іńkár men Káýsar esimdi qaryndastary bar. Egizderdiń esimin naǵyz atqaminer azamattar bolsyn degen yrymmen ájesi qoıypty.
«Sol jyldary Qasym-Jomart Toqaev el bolashaǵy úshin mańyzdy laýazymdarda qyzmet atqardy. Birneshe tildi biledi, dıplomat, bilikti saıasatker, memleketshil azamat. Týǵan aılary da bir. Tuńǵysh nemerelerim 22 mamyrda dúnıege kelgende birden «Qasym-Jomarttaı bolsyn» dep tiledim. «Jaqsy sóz – jarym yrys» degen, búginde qos qulynshaǵym Memleket basshysyna uqsap ósip keledi», - deıdi Zúlfııa Joldasova.
Egizder kishkentaıynan zerektigimen kózge túsken. Qazir Aqtaýdaǵy №11 mamandandyrylǵan fızıka-matematıkalyq lıtseıiniń 8-synybynda oqıdy. Qazaq, orys jáne aǵylshyn tilderinde erkin sóıleıdi. Ekeýi de matematıkany jaqsy kóredi, esep-qısapqa júırik. Sózge de sheshen bolǵylary keledi. Ol úshin kórkem ádebıetti, tarıhty qyzyǵa oqyp, jańalyqtardan árdaıym habardar bolyp júredi. Sporttan da qur alaqan emes, bokspen aınalysady. Armandary da bir – bolashaqta dıplomat bolý jáne Prezıdent Qasym-Jomart Toqaevpen kezdesý.
Balalarynyń únemi izdeniste júretinin, bilimge qushtarlyǵyn ákesi olardyń óz esimderiniń jaýapkershiligin sezinetindiginde dep esepteıdi.
«Balalar árdaıym izdeniste júredi. Túrli bilim jarystaryna, olımpıadalarǵa qatysyp, júldeli oryndardy ıelenip júr. Minezderi de óte baısaldy, kommýnıkatıvti, boılarynda dıplomattyń qasıetteri bar. Qasym-Jomart Toqaevty úlgi tutady, ol teledıdardan sóılegende ár sózine mán berip tyńdaýǵa tyrysady. Kóp til bilý maqsatynda qosymsha úıirmelerge qatysyp, aǵylshyn tilin jetik meńgerip júr. Aldaǵy ýaqytta frantsýz, qytaı tilderin úırengileri keledi», - deıdi Erlan Máýlenov.
Oqı otyryńyz, elimizde Qazaqstan esimdi 32 adam turady. Sondaı-aq, 86 Teńge, 26 Astana, 67 Elbasy bar. Bir adamnyń aty Táýelsizdik bolsa, taǵy 1 turǵynnyń esimi – Atazań jáne 1 qyzdyń aty – Arý-Astana. Al, bıylǵy oraza aıynda dúnıege kelgen uldarǵa Ramazan (1 085), qyzdarǵa Medına (430) esimi eń kóp qoıylǵan.
Foto: mangystaumedia.kz
