Aqtaýlyq dárigerler bas súıegi synǵan 12 jasar balany aman alyp qaldy

AQTAÝ. QazAqparat - Aqtaýda bas súıegi synǵan 12 jasar balany jergilikti dárigerler ota jasap, aman alyp qaldy, dep xabarlaıdy QazAqparat tilshisi.

Mańǵystaý oblystyq densaýlyq saqtaý basqarmasy baspasóz qyzmetiniń málimetinshe, 2007 jyly týǵan naýqas 29 mamyr kúni 19.00 shamasynda oblystyq balalar aýrýxanasynyń qabyldaý bólimine Qaraqııa aýdany, Jetibaı aýylynan aýyr xalde kelip túsken. Oǵan bas súıegi synǵan degen dıagnoz qoıyldy.

Neıroxırýrgtardyń qaraýynan keıin dárigerler dereý ota jasaýǵa kirisedi. Osylaısha, bir jarym saǵat boıy dárigerler balanyń bas súıegin tigip, epıdýraldy gematomany joıýǵa kúsh saldy.

Qazirgi ýaqytta balanyń jaǵdaıy birqalypty.

Ájesiniń aıtýynsha, jetkinshek fýtbol alańynda oınap júrgende ústine qaqpa qulap, basynan jaraqat alǵan.