Aqtaýlyq albınos qyz amerıkalyq ónimniń jarnama rolıgine tústi

AQTAÝ. QazAqparat- Aqtaýlyq erekshe kelbetimen tanylǵan albınos qyz Ásel Qalaǵanova shashqa arnalǵan amerıkalyq ónimniń jarnama rolıgine tústi, dep habarlaıdy QazAqparat tilshisi.

Bir mıýnttyq vıdeorolıkte Aqtaýdan bólek, elimizdiń basqa da kórikti jerleri túsirilgen. Operatory - kıno ındýstrııasyndaǵy tanymal klıpmeıker Azamat Dýlatov. Vıdeo áleýmettik jelide jarııalana salysymen jeli qoldanýshylarynyń oń baǵasyn aldy.

Eske salsaq, Aqtaýdaǵy Qalaǵanovtar otbasynda erekshe eki qyz dúnıege kelgen. Ásel men Kamılanyń arasy 13 jas. Jetkinshekterdiń aqshyl tústi qas-kirpigi men shashy syrt kózge birden baıqalady. Bir qyzyǵy, olardyń baýyry Aldııarda mundaı erekshelik joq. Jaratylysy bólek qyzdar búginde kóptiń nazarynda. Máselen, Ásel Qalaǵanova 10 jasynan modeldik mektepte oqyp, birneshe ret jarnamaǵa túsken.