Aqtaýlyqty 58 mln teńgege aldaǵan alaıaq Oralda ustaldy

ORAL. KAZINFORM — Oralda krımınaldyq polıtsııa qyzmetkerleri memleketaralyq izdeýde bolǵan Aqtaý qalasynyń 28 jastaǵy turǵynyn qolǵa túsirdi.

BQO polıtsııa departamentiniń baspasóz qyzmetinen málim etkenindeı, alaıaq bıylǵy qańtar-sáýir aılarynda 10 paıyz tabys bolady dep Aqtaý turǵynyn aldaǵan.

Onyń senimine kirip, 58 mıllıon teńgeden astam qarjysyn ıemdendi degen kúdikke ilingen. 

— Kúdikti ýaqytsha ustaý ızolıatoryna qamaldy, al onyń ustalǵany jóninde bastamashy organ — Mańǵystaý oblystyq polıtsııa departamentine habarlandy. Budan bólek, tergeý men sottan jasyrynǵan tulǵalardy anyqtaý boıynsha júrgizilip jatqan júıeli jumystyń nátıjesinde jyl basynan beri BQO polıtseıleri izdeýdegi 54 adamdy ustaǵan, — dep habarlady vedomstvodan.

Eske sala keteıik, budan buryn BQO-da asa iri kólemde alaıaqtyq jasaǵan kúdikti izdestirilip jatqanyn jazǵan edik.