Aqtaýlyqtar jylý berý maýsymy aldynda ákimdikten kómek surady

AQTAÝ. KAZINFORM – Aqtaý qalasyndaǵy 3A shaǵynaýdannyń 16 úıiniń turǵyndary úıleriniń apattyq jaǵdaıyna baılanysty jergilikti bılikten kómek surady.

Olardyń aıtýynsha, 3A shaǵynaýdanyna qyzmet kórsetetin turǵyn úı-kommýnaldyq sharýashylyq uıymy óz mindetinen bas tartqannan keıin, úıdegi ınjenerlik kommýnıkatsııalardyń jaǵdaıy kúrt nasharlaǵan.

-Úıdiń jertólesiniń jaǵdaıy nashar, qubyrlardyń qosylǵan jerleri skotchpen oralǵan, sý aǵyzý júıesi múlde joq. Ystyq sý berilgen jaǵdaıda qubyr jarylyp, sý basý qaýpi bar. Saldarynan búkil úı jylýsyz qalýy múmkin, - deıdi turǵyndar.

Turǵyndar kommýnaldyq qyzmetter úshin tólemder turaqty tólenetinin, alaıda jaýapty mekeme qarajatty alyp, jumys istemeıtinin aıtady. Sondyqtan olar ákimdik tarapynan tıisti tekserýler júrgizip, jylý berý maýsymy bastalǵanǵa deıin ınjenerlik jelilerdi qalpyna keltirý boıynsha sharalar qabyldaýdy suraıdy.

Aqtaý qalalyq turǵyn úı ınspektsııasynyń habarlaýynsha, atalǵan úıdiń kommýnaldyq júıesindegi aqaý qalpyna keltirilgen.

-7 qazan kúni 3a shaǵynaýdandaǵy 16 úıdiń jertólesindegi káriz qubyrynan aqaý anyqtaldy. Qazirgi ýaqytta kommýnaldyq mamandardyń kúshimen qubyr qalpyna keltirildi. Aıta keteıik, buǵan deıin atalǵan turǵyn úıge qyzmet kórsetýshi mekeme jumysyna jaýapkershilik tanytpaı, qyzmet kórsetýden bas tartqan. Qazir basqa mekememen kelisimshart jasalyp jatyr, - delingen habarlamada.

Buǵan deıin, Aqtaýda jylý berý maýsymy 7 qazan kúni bastalatyny týraly jazǵan bolatynbyz.