Aqtaýlyqtar tútin ıisine shaǵymdandy
AQTAÝ. KAZINFORM — Mańǵystaý oblystyq tótenshe jaǵdaılar departamentiniń «112» nómirine qońyraý shalyp, tútinniń ıisine shaǵymdanǵandar kóp.
Órttiń ıisi Munaıly men Túpqaraǵan aýdandarynda, Fort-Shevchenko men Aqtaý qalasynda sezilýde.
Oblystyq ekologııa departamentiniń habarlaýynsha, birneshe aýmaqta atmosferalyq aýadan synama alý úshin, mamandar jumyldyrylǵan.
— Osy oqıǵaǵa baılanysty Atyraý, Aqtóbe, Batys Qazaqstan oblysy boıynsha tótenshe jaǵdaılar departamentteri, sondaı-aq shekaralas respýblıkalardyń tótenshe jaǵdaılar mınıstrliginiń Astrahan oblysy men Túrikmenstannyń Balqanabat qalasynyń azamattyq qorǵanys jáne tótenshe jaǵdaılar jónindegi memlekettik organy, Ázerbaıjan respýblıkasynan aqparattar suratyldy. Aldyn ala boljam boıynsha Reseı Federatsııasynyń Astrahan oblysy Tótenshe jaǵdaılar mınıstrliginiń aımaqtyq aqparaty boıynsha, ıis qamystyń tutanýynan bolýy múmkin, — delingen habarlamada.
Qazirgi ýaqytta tótenshe jaǵdaılar departamentiniń qyzmetkerleri men ekologtar monıtorıng jumystaryn júrgizýde.
Buǵan deıin, Mańǵystaýda qytaılyqtarǵa jumys isteýge «ruqsat bergen» laýazym ıesi qamaýǵa alynǵany týraly jazǵan bolatynbyz.