Aqtaýlyqtar máslıhat depýtattaryn saılaý úshin daýys berip jatyr
AQTAÝ. KAZINFORM – Aqtaýda qalalyq máslıhattyń bos depýtattyq mandattary boıynsha saılaý bastaldy. Tańǵy saǵat 7:00-den beri 12 saılaý ýchaskesi jumysyn jalǵastyryp jatyr.
Qaladaǵy № 13, № 14 jáne № 20 saılaý okrýgterine qarasty ýchaskeler óz jumysyn bastady.
Onyń ishinde:
— 26 sh/a, № 14 jalpy bilim beretin mektebi (2 saılaý ýchaskesi);
— 27 sh/a, Aqtaý tehnıkalyq qyzmet kórsetý kolledji (2 saılaý ýchaskesi);
— 27 sh/a, № 16 jalpy bilim beretin mektebi;
— 27 sh/a, № 46 Balbulaq balabaqshasy;
— 28 sh/a, № 59 S. N. Shapaǵatov bóbekjaıy;
— 28a sh/a, № 23 jalpy bilim beretin mektebi;
— 33 sh/a, «Mańǵystaý Arena» sport kesheni(2 saılaý ýchaskesi);
— 34 sh/a, № 19 mektep-gımnazııa (2 saılaý ýchaskesi) bar.
«Daýys berý saǵat 20:00-ge deıin jalǵasady. Saılaýǵa úsh okrýg boıynsha 10 úmitker qatysýda. Daýys berýshiler óz mekenjaıyna qarasty ýchaskege baryp, úmitkerlerge daýys bere alady», — dedi Aqtaý qalalyq saılaý komıssııasynyń tóraǵasy Erǵalı Skendırov.
Sondaı-aq, № 249 ýchaskede alǵashqy bolyp 61 jastaǵy turǵyn daýys berdi. Aqtaý qalasynyń turǵyny Qadyrbek Kaýmetov ýchaskege birinshi bolyp kelgen.
«Saılaý bolady dep tańerteń erte turyp, daýys berýge keldim. Men úshin ár saılaý erekshe mańyzdy. Sondyqtan jerlesterimdi saılaýǵa beı-jáı qaramaýǵa shaqyramyn», — dedi Qadyrbek Kaýmetov.
