Aqtaýlyqtar qytaı kólikteriniń servıstik qyzmetiniń qymbattyǵyna shaǵymdandy
AQTAÝ. KAZINFORM — Aqtaý qalasyndaǵy «Ekzıd» avtosalony tutynýshylarynyń aıtýynsha, servıstik qyzmettiń quny naryqtaǵy baǵadan 2-2,5 ese joǵary.

Aqtaý qalasynyń turǵyny Saparmurat Seıtmuratovtyń kólik satyp alǵanyna 2 jyldan asqan. Sodan beri ol temir tulparynyń motor maıyn 3-4 ret aýystyryp, qaltasy qaǵylǵan.

— Birinshi ret tek maı men súzginiń ózin 60 myń teńgege aýystyrdy. Odan keıin 80 myńǵa aýystyrdy. Basqa jerde ol 30 myń teńgeniń shamasynda. Eger de basqa lıtsenzııasy bar, qujattalǵan servıstik mekemelerden aýystyrsaq, kepildikten shyǵaryp tastaıdy, — deıdi ol.

Turǵyndar alǵashqy kezde servıstik qyzmettiń qoljetimdi baǵada bolǵanyn aıtady. Biraq keıin kúrt qymbattap ketken.
— Bul kóptegen turǵynnyń máselesi. Basynda maıdyń baǵalary ortasha qoljetimdi boldy. Sońǵy kezde maıdyń baǵasy, motordyń maıyn aýystyrý óte qymbattap ketti. Hıýndaı, toıotalardiki bul jerden 20 paıyz tómen. Osy máseleni sheship berýdi suraımyz, — deıdi Aqtaý qalasynyń turǵyny Quralbek Islamov.

Al, atalǵan dılerlik ortalyqtyń ókili Ekaterına Kopylovanyń sózinshe, ortalyq tutynýshylarǵa sapaly qyzmet kórsetýdi ǵana kózdeıdi.
— Tutynýshylardyń shaǵymdaryn eskeremiz. Aryzdaryn aldyq. Bul jaǵdaıdy zerdeleımiz. Kólik ıeleriniń ár talabyn muqııat qarap, mindetti túrde jaýap beremiz, — deıdi dılerlik ortalyqtyń ókili.

Mańǵystaý oblysy boıynsha saýda jáne tutynýshy quqyǵyn qorǵaý departamentiniń basshysy Raýan Muhaevtyń málimetinshe, qytaı avtokólikterine qatysty aryz-shaǵym túspegen.
— Eger avtosalondar jańa kólikke qosymsha qosalqy zattardy (sıgnalızatsııa, tonırovka t. b.) májbúrleıtin bolsa, zańnamada jaýapkershilik qarastyrylǵan. Bul bizdiń departamenttiń quzyretine kiredi. Al avtosalondardyń ishki jumysy men qyzmetterine (maı aýystyrý, jóndeý jumystary t. b.) departament aralasa almaıdy, — deıdi Raýan Muhaev.
Buǵan deıin, Aqtaýda jasóspirim kúıip qalǵan jylý jelisindegi apatqa qatysty qylmystyq is qozǵalǵanyn jazǵan bolatynbyz.